Թրամփը խոսել է Բոլթոնի՝ պաշտոնից ազատման մասին ու նշել, որ թափուր պաշտոնին հավակնում է 5 թեկնածու

ԱՄՆ նախագահ Դոնալդ Թրամփը հայտարարություն է տարածել, ըստ որի` aզգային անվտանգության հարցերով խորհրդականի պաշտոնին հավակնում է 5 թեկնածու։ Այս մասին հայտնում է ՌԻԱ «Նովոստի» գործակալությունը։

Թրամփի հավաստմամբ՝ այս հինգ թեկնածուներն էլ խորհրդականի պաշտոնը զբաղեցնելու մեծ ցանկություն ունեն։

«Կա հինգ թեկնածու, որոնց հետ ծանոթացել եմ վերջին 3 տարիների ընթացքում և որոնց համարում եմ բարձր որակավորում ունեցող մասնագետներ»,- մանրամասնել է ԱՄՆ նախագահը ու տեղեկացրել նաև, որ ազգային անվտանգության հարցերով նոր խորհրդականի անունը հայտնի կլինի հաջորդ շաբաթ։

Ինչ վերաբերում է այդ պաշտոնից Ջոն Բոլթոնի ազատմանը, ապա ԱՄՆ նախագահը նշել է, որ Բոլթոնը վարչակազմի մի շարք աշխատակիցների հետ ընդհանուր  լեզու չի գտել և «մի քանի լրջագույն սխալներ է թույլ տվել»։

«Իրականում ես շատ լավ հարաբերություններ եմ ունեցել Բոլթոնի հետ, սակայն նա ընդհանուր լեզու չէր գտնում վարչակազմից մարդկանց հետ, որոնք ինձ համար կարևոր նշանակություն ունեն»,- ասել է Թրամփը: