Այս տարի հայալեզու գրքեր չեն առաքվի Վրաստան. պաշտոնյայի պարզաբանումը

Այս տարի հայոց լեզվով դասագրքեր չեն ուղարկվի Վրաստանի հայկական դպրոցներ․ Yerkir.am-ի հետ զրույցում հայտնեց Մերձավոր սփյուռքի հետ կապերի վարչություն պետ Տարոն Շագոյանը։ Պարզաբանեց՝ հուշագրով սահմանված է, որ դասագրքերը երեք տարին մեկ են առաքվում:

Ինչ վերաբերում է Վրաստան գրքեր տեղափոխելու խնդիրներին, ապա վարչության պետն ասաց՝ խնդիրներ չեն առաջանում։ «Մյուս տարի ԿԳՄՍ նախարարությունը պետք է զբաղվի առաքման հարցերով: Մենք դիմում ենք Վրաստանի կրթության նախարարությանը, նրանք դա ճանաչում են  որպես հումանիտար բեռ ու բաժանում հայկական դպրոցներին»,- նշեց նա:

Անդրադառնալով Սփյուռքի գործերով գլխավոր հանձնակատար Զարեհ Սինանյանի հնարավոր այցին վիրահայոց համայնք՝  Շագոյանն ասաց. «Առայժմ որոշված չէ, թե երբ նման այց կլինի: Եթե որոշվի, ապա այցի օրակարգն էլ հետը կներկայացնենք»:

Հիշեցնենք, որ Վրաստանի հայկական դպրոցները տևական ուշացումներով են ստացել Հայաստանից առաքվող դասագրքերը։ Որպես պատճառաբանություն բերվել են Վրաստանի իշխանությունների հարուցած արհեստական խոչընդոտները։