Տասնվեց երկրից Հայաստան ժամանած սփյուռքահայ ուսուցիչները կվերապատրաստվեն հայրենիքում

Արտերկրում գործող հայկական վարժարաններում, նախակրթարաններում և դպրոցներում դասավանդող հայագիտական առարկաների  մանկավարժները մեկ ամսվա ընթացքում կվերապատրաստվեն Հայաստանում: Այսօր Խ. Աբովյանի անվան Հայաստանի պետական մանկավարժական համալսարանում տեղի է ունեցել սփյուռքահայ ուսուցիչների վերապատրաստման ամենամյա դասընթացների մեկնարկի արարողությունը:

Մանկավարժների համար կկազմակերպվեն հանդիպումներ, ճանաչողական- ուսուցողական շրջայցեր, մշակութային ծրագրեր:

Այս տարի նախատեսված է վերապատրաստում հինգ ուսումնական խմբերում` մանկապարտեզի, տարրական ուսուցման, մեկօրյա դպրոցների, հայոց լեզվի ու գրականության դասավանդման, նկարչության և կիրառական արվեստի ուղղություններով:

Նախատեսված էր նաև ճատրակի խումբ, որը, սակայն, չի համալրվել: Առավել մեծ թվով ուսուցիչներ գրանցվել են «Մեկօրյա դպրոցում ուսուցման» և «Հայոց լեզվի և գրականության» խմբերում:

Դասընթացների վերջում ուսուցիչներին տրվելու է  ՀՀ ԿԳՄՍ նախարարության և Խ.Աբովյանի անվան հայկական մանկավարժական համալսարանի վկայագիր: