Ռուսաստանը թուրքական լոլիկները փոխարինում է ուզբեկականով

Ռուսաստանի էկոնոմիկայի նախարար Մաքսիմ Օրեշկինը հայտարարել է, որ Ուզբեկստանում արտադրված մի շարք մրգեր և բանջերեղեն կփոխարինեն երկիր ներկրվող այլ երկրների ապրանքներին. հաղորդում է Sputnik-ի թուրքական ծառայությունը:

Ըստ նախարարի` այս ճանապարհով ռուսական շուկայում իրենց տեղը կկորցնեն մի շարք ապրանքներ, օրինակ` թուրքական լոլիկները: Ըստ Օրեշկինի` քանի որ  Ուզբեկստանում վերացվել են գյուղատնտեսական ապրանքների արտահանման արգելքները, և այդ երկրի ապրանքների դերը մեծացնելու համար մի շարք օրինագծեր են պատրաստվել, այդ համաձայնությունների արդյունքում Թուրքիայի դերը ռուսական շուկայում կնվազի:

«Ըստ իմ անձնական կարծիքի` թուրքական ապրանքներն ավելի ցածրորակ են: Ավելի կնախընտրեմ ուզբեկական լոլիկները, քան թուրքականը»,- ասել է նա:

Նշենք, որ Ռուսաստանի սահմանային անցակետերից ստուգման աշխատանքների հետևանքով հազարավոր տոննա թուրքական ապրանքներ են ետ ուղարկվում` ապրանքների անորակության կամ վնասատու միջատների առկայության պատճառով: