Դավիթ Գարեջի վանական համալիրը Ադրբեջանի տարածքն է. Ադրբեջանի ԱԳ նախարարի տեղակալ

Բաքուն Վրաստանի հետ պետական սահմանի զատման հարցով բանակցություններում հաստատել է իր դիրքորոշումը` Դավիթ Գարեջի վանական համալիրը Ադրբեջանի տարածքն է: Այդ մասին հայտարարել է Ադրբեջանի ԱԳ նախարարի տեղակալ Խալաֆ Խալաֆովը. հայտնում է Интерфакс-Азербайджан-ը:

«Միջազգային իրավունքի համաձայն` ԽՍՀՄ փլուզումից հետո Ադրբեջանը և Վրաստանը ավտոմատ կերպով դարձան գոյություն ունեցող վարչական սահմանների իրավահաջորդները: Ապագայում այդ սահմանները պետական դարձան և անցան երկու երկրների սահմանապահ ծառայությունների վերահսկողության տակ»,- ասել է նա:

«Փաստ է, որ համալիրի տարածքում սահմանը միշտ եղել է և պահպանվել ու պահպանվում է մեր և վրացական կողմի սահմանապահ ծառայությունների կողմից»,- հավելել է նախարարի տեղակալը:

Խալաֆովն ընդգծել է, որ վրաց ուխտագնացները քարանձավներ մուտք են ունեցել վրացական կողմի հետ փոխադարձ պայմանավորվածության հիման վրա` ադրբեջանցի սահմանապահների հսկողության տակ: «Դա այսօր ևս տեղի է ունենում: Ինչ վերաբերում է ինչ-որ գյուղատնտեսական աշխատանքների, ապա դա յուրաքանչյուր կողմի  ինքնիշխան իրավունքն է»,- ասել է նա: