Դատախազությունը Քոչարյանին կալանքից ազատելու Արցախի նախագահների դիմումի մասին դիրքորոշում կհայտնի դատական նիստին

ՀՀ դատախազությունը հաջորդ դատական նիստին իր դիրքորոշումը կհայտնի Արցախի նախագահ Բակո Սահակյանի և երկրորդ նախագահ Արկադի Ղուկասյանի՝ ՀՀ երկրորդ նախագահ Ռոբերտ Քոչարյանին կալանքից ազատելու դիմումի մասին:Այս մասին գլխավոր դատախազ Արթուր Դավթյանն ասաց ԱԺ-ում լրագրողների հետ զրույցում:

Անդրադառնալով լրագրողի դիտարկմանը, որ Քոչարյանի պաշտպանները պատրաստվում են հաջորդ դատական նիստին ներկայացնել Արցախի նախագահների նամակն ու երաշխավորման հիմքերը՝ դատախազն ասաց. «Դատախազությունն արդեն այդ փուլում՝ որպես կողմ, դիրքորոշում է հայտնելու դրա մասին։ Եթե չեմ սխալվում, նիստը լինելու է մայիսի 13-ին: Դատախազությունը կներկայանա և այդ օրն իր դիրքորոշումը կհայտնի»։