Իրավիճակը փրկելու համար կա փակվող մի պատուհան. Զարիֆը՝ Միջուկային գործարքի մյուս կողմերին

Իրանի ԱԳ նախարար Մոհամմադ Ջավադ Զարիֆը «Twitter»-ի իր միկրոբլոգում անդրադարձել է Իրանի՝ Միջուկային համապարփակ համաձայնագրով ստանձնած իր որոշ գործողությունների կասեցման մասին որոշմանը:

«2018 թվականի մայիսի 8-ին ԱՄՆ-ն դուրս եկավ Միջուկային գործարքից, խախտեց ՄԱԿ-ի ԱԽ-ի 2231 բանաձեւը եւ փորձեց մյուսներին, այդ թվում՝ եվրոպական երեք երկրներին ստիպել նման կերպ վարվել: Մեկ տարի համբերությունից հետո, Իրանը դադարեցրեց այն գործողությունները, որոնց իրականացումն անհնար էր դարձրել ԱՄՆ-ն: Իրավիճակը փրկելու համար, համաձայնագրում մնացած մյուս 5 երկրներն ունեն փակվող մի պատուհան»,- գրել է Իրանի ԱԳՆ ղեկավարը:

Ավելի ուշ, Մոսկվայում Իրանի դեսպանատանը կայացած միջոցառման ժամանակ Զարիֆը հայտարարել է`այժմ արդեն միջազգային հանրության հերթն է կատարելու իր պարտավորությունները. տեղեկացնում է ԻՌՆԱ-ն: «Անցյալ մեկ տարվա ընթացքում Իրանը, ԱՄՆ-ի՝ Միջուկային համապարփակ համաձայանգիրը չեղարկելուն ուղղված քայլերի նկատմամբ ռազմավարական համբերություն ցուցաբերեց, փաստելով, որ իրագործում է իր ստանձնած պարտավորությունները: Մենք ապացուցեցինք, որ հինավուրց երկիր ենք, որը շատ համբերատար է, սակայն պատրաստ ենք պայքարել մեր իրավունքների իրականացման համար: Այժմ արդեն միջազգային հանրության հերթն է` կատարելու իր պարտավորությունները»,- ասել է Իրանի արտաքին քաղաքական գերատեսչության ղեկավարը: