Ադրբեջանն ամենաշատ ազատազրկված լրագրողներ ունեցող երկրներից է. զեկույց

«Լրագրողներ առանց սահմանների» կազմակերպությունը հրապարակել է տարեկան զեկույց տարբեր երկրներում մամուլի ազատության վերաբերյալ: Զեկույցում նշվում է, որ նախկին ԽՍՀՄ հանրապետություններում մամուլը շարունակում է բարդ կացության մեջ լինել: Ռուսաստանում և Ադրբեջանում բանտարկված են ամենաշատ թվով լրագրողներ և բլոգերներ: Ամենաբարդը հետաքննող լրագրողների վիճակն է. հաղորդում է «Թուրան» գործակալությունը:

Այս տարի Ադրբեջանը կազմակերպության կազմած ինդեքսում զբաղեցրել է 166-րդ տեղը: «Չբավարարվելով բազմակարծության ճնշմամբ` իշխանությունները դաժան պատերազմ են մղում ԶԼՄ-ներում մնացած քննադատների դեմ: Անկախ լրատվամիջոցները, ինչպիսիք են, օրինակ, «Զերկալո»-ն և «Ազատությունը», ճնշվել են տնտեսապես, իսկ «Ազատություն» ռադիակայանը ստիպողաբար է փակվել: Հիմնական անկախ կայքերը փակվել են: Փորձելով լռեցնել բոլորին, ովքեր դեռևս դիմադրություն են ցույց տալիս արտասահմանից, պետությունը հետապնդում է նրանց ընտանիքներին»,- գրված է զեկույցում: