Ալումյանը Ռոբերտ Քոչարյանի կողմից պարգևատրված դատավորին ինքնաբացարկ հայտնելու հիմքեր չի տեսնում

Վերաքննիչ քրեական դատարանում, դատավոր Ռուզաննա Բարսեղյանի նախագահությամբ, մեկնարկել է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը ևս երկու ամիս ժամանակով երկարացնելու վերաբերյալ առաջին ատյանի դատարանի որոշման դեմ պաշտպանական խմբի կողմից ներկայացված բողոքի քննությունը:

Մամուլում տեղ գտած հրապարակումների համաձայն` դատավոր Ռուզաննա Բարսեղյանը 2007 թվականին Ռոբերտ Քոչարյանի կողմից պարգևատրվել է «Մխիթար Գոշ» մեդալով։

Մինչ նիստի մեկնարկը` ՀՀ երկրորդ նախագահի փաստաբան Հայկ Ալումյանը, պատասխանելով լրագրողների հարցին, թե արդյո՞ք սա կարող է հիմք հանդիսանալ դատավորի ինքնաբացարկի ներկայացման համար, ասաց. «Ես էլ լսել եմ, որ նա պարգևատրված է եղել պարոն Քոչարյանի կողմից։ Պարոն Քոչարյանը չհիշեց այդպիսի բան։ Բայց ես հաստատ գիտեմ, որ նա ԱՄՆ դեսպանատան կողմից էլ է պարգևատրված եղել։ Եվ եթե այս ամենը գումարենք, կստացվի, որ լավ դատավոր է, որ պարգևատրվել է: Ամեն դեպքում` ես դատավորին ինքնաբացարկ հայտնելու միջնորդություն ներկայացնելու հիմքեր չեմ տեսնում»:

Հարցին, թե արդյո՞ք որևէ պաշտոնյա փորձել է հանդիպել կալանավայրում գտնվող Ռոբերտ Քոչարյանի հետ, փաստաբանը պատասխանեց` մարդու իրավունքների պաշտպանը:

Ալումյանը մանրամասնեց նաև, որ, նախքան բողոքի քննությանն անցնելը,  փորձելու են հասկանալ, թե ինչ եղանակով է բողոքը մակագրվել դատավոր Ռուզաննա Բարսեղյանին: Բացի այդ` պաշտպանական կողմը միջնորդել է առանց քննության թողնել դատախազության բողոքը: «Մենք միջնորդել ենք, որպեսզի  դատախազների վերաքննիչ բողոքը թողնվի առանց քննության, որովհետեւ օրենքով նախատեսված չէ, որ դատախազները կարող են դատարանի որոշման պատճառաբանական մասը բողոքարկել»,- պարզաբանեց փաստաբանը:

Հավելենք, որ այսօրվա դատական նիստին ներկա է եղել նաև Ռոբերտ Քոչարյանը: