Սիրիայի արտգործնախարարությունը հայտարարել է, որ Գոլանի բարձունքները կմնան որպես հանրապետության տարածք

Գոլանի բարձունքները եղել և կմնան Սիրիայի տարածք: Այս մասին ասվում է Արաբական Հանրապետության արտաքին գործերի նախարարության՝ չորեքշաբթի տարածած հայտարարության մեջ:

«Գոլանը եղել է և կշարունակի մնալ Սիրիայի Արաբական Հանրապետության տարածք»,- ասվում է SANA գործակալության տարածած հայտարարության մեջ:

Սիրիայի ԱԳՆ-ն նաև խստորեն դատապարտում է Միացյալ Նահանգների դիրքորոշումը, որը ճանաչել է Իսրայելի ինքնիշխանությունն այդ տարածքների նկատմամբ, և ընդգծում սիրիական իշխանությունների մտադրությունը` «վերադարձնել իրենցից գրավված հողերը ցանկացած միջոցով»:

Գոլանի բարձունքները, որոնք պատկանում են Սիրիային, Իսրայելը գրավել է 1967 թվականի Վեցօրյա պատերազմի ժամանակ: 1981-ին Կնեսետը (Իսրայելի խորհրդարանը) ընդունեց Գոլանի բարձունքների մասին օրենք, որով միակողմանիորեն հայտարարվել է Իսրայելի ինքնիշխանությունն այդ տարածքի վրա: 1981 թ. դեկտեմբերի 17-ին ՄԱԿ-ի Անվտանգության խորհրդի 497 բանաձևով բռնակցումը հայտարարվեց անօրինական:

Դոնալդ Թրամփի նախագահության տարիներին Միացյալ Նահանգները Երուսաղեմը ճանաչեց որպես Իսրայելի մայրաքաղաք, ճանաչվեց նաև հրեական պետության ինքնիշխանությունը սիրիական Գոլանի բարձունքների նկատմամբ: Բացի դրանից՝ Վաշինգտոնը դադարեց  Հորդանան գետի արևմտյան ափին հրեական բնակավայրերի կառուցումը համարել որպես միջազգային իրավունքի խախտում: