ԱՄՆ կոնգրեսականներ Շիֆը և Բիլիրակիսը լիովին աջակցում են Հայոց ցեղասպանության ճանաչման և ոգեկոչման` ԱՄՆ քաղաքականությանը

ԱՄՆ  Կոնգրեսի Ներկայացուցիչների պալատի անդամ Ադամ Շիֆը (Դեմոկրատական կուսակցություն) և Գաս Բիլիրակիսը (Հանրապետական կուսակցություն) այսօր կոչ են արեկ իրենց գործընկերներին` միանալ Հայոց ցեղասպանության ճանաչմանն ուղղված բանաձևին, որը երկկուսակցական օրենսդրական նախագիծ է` նպատակաուղղված վերոնշյալ հարցում ԱՄՆ-ի համապատասխան քաղաքականությանը: Այս մասին հաղորդում է ԱՄՆ Հայ Դատի հանձնախումբը:

Բանաձևը պահանջում է`
1. Հայոց ցեղասպանության ժխտման վերացում,
2. ԱՄՆ ներկայիս պաշտոնատար անձանց և կառավարության կողմից այդ հանցագործության ճանաչում և զոհերի հիշատակի ոգեկոչում,
3. Հայոց ցեղասպանության պատմության դասավանդում` նպատակ ունենալով կանխարգելել նմանատիպ վայրագությունները մեր ժամանակներում:

Բանաձևի հեղինակներն այս պահին հավաքագրում են իրական համահովանավորների և ակնկալում շուտով ներկայացնել իրենց նախագիծը Ներկայացուցիչների պալատին:

«Մենք ցանկանում ենք շնորհակալություն հայտնել կոնգրեսականներ Շիֆին և Բիլիրակիսին երկկուսակցական աջակցություն ցուցաբերելու համար` հիմնված ԱՄՆ-ի` Հայոց ցեղասպանության զոհերի հիշատակի ոգեկոչման պաշտոնական քաղաքականության վրա: Հայոց ցեղասպանության շարունակական ճանաչման և կանոնավոր ոգեկոչման ինստիտուցիոնալացումից բացի, այս բանաձևը, մասնավորապես, պաշտոնապես մեկընդմիշտ մերժում է ԱՄՆ կառավարության և ամերիկացի ժողովրդի ցանկացած կապ այդ հանցագործության ժխտման հետ»,- ասել է ԱՄՆ Հայ Դատի հանձնախմբի նախագահ Րաֆֆի Համբարյանը: