Թուրքիան սկսել է ամերիկյան «Պատրիոտ»-ներ գնելու բանակցությունները

Թուրքիայի արտաքին գործերի նախարար Մևլութ Չավուշօղլուն հայտարարել է, որ ԱՄՆ-ի հետ սկսվել է հակահրթիռային «Պատրիոտ» համակարգերի գնման գործընթացը:

Ըստ «Անադոլու» գործակալության` Չավուշօղլուն տեղական հեռուստաընկերություններից մեկին տված հարցազրույցում նշել է. «Պատրիոտ»-ներ գնել չկարողանալու պատճառով ենք S-400 ձեռք բերել: Մինչ այսօր «Պատրիոտ»-ի գնման հարցով մոտ 2 տարի առաջ մեր ուղարկած նամակին դրական պատասխան է եկել ամերիկացիներից: Այժմ ամերիկացիները նշում են, որ կարող են վաճառել, և սկսվել են բանակցությունները: Մենք ունենք օդային պաշտպանության կարիք: Մեր շուրջը լուրջ ռիսկեր և վտանգներ կան: Հրթիռային վտանգ էլ կա: Այդ իսկ պատճառով ստիպված ենք պաշտպանել մեր օդային սահմանը»:

Չավուշօղլուն նաև հայտնել է, որ Ռուսաստանից S-400-ի գնումը չեղյալ հայտարարելու մասին խոսելն անհնար է:

Նա այս հայտարարությունը արել է այն բանից հետո, երբ Bloomberg հեռուստաալիքում տարածվեց լուրը, թե Թուրքիան մերժել է ԱՄՆ-ի` մինչև տարեվերջ «Պատրիոտ»-ներ տրամադրելու առաջարկը: Ըստ այդ լուրի` ԱՄՆ-ն այս առաջարկը արել էր Ռուսաստանից S-400-ի գնման գործարքը չեղյալ հայտարարելու պահանջով: