Ես Ադրբեջանի պատրիոտ չեմ. Աքրամ Այլիսլի

Ադրբեջանցի գրող Աքրամ Այլիսլին haqqin.az-ի հետ զրույցում մեկնաբանել է իր վերջին հարցազրույցը Русский репортер պարբերականի հետ:

«Անձամբ ես հայերին թշնամի չեմ համարում: Բազմիցս հայտարարել եմ, որ ինձ անհանգստացնում է ստեղծված իրավիճակը, և միշտ կողմ եմ հանդես եկել ադրբեջանցի և հայ ժողովուրդների միջև խաղաղության հաստատմանը: Ես չեմ վախենում: Իշխանություններն ինձ զրկեցին Ժողովրդական գրող կոչումից, ճնշում գործադրեցին իմ ընտանիքի վրա, և ես արդեն ոչնչից չեմ վախենում: Ես իմ դարն արդեն ապրել եմ, և հիմա ամենակարևորը մեր ժողովուրդների միջև խաղաղության հաստատումն է»,- ասել է նա:

Նա նշել է, որ այդ ամբողջ պայքարը մի հողի համար է, որը ոչ ոքի պետք  չէ: «Կարծում եմ` ադրբեջանցիները և հայերը կրկին խաղաղ կապրեն, եթե քաղաքական գործիչները նրանց չխանգարեն»,- ասել է նա:

Այլիսլին նաև նշել է, որ իրեն Ադրբեջանի պատրիոտ չի համարում:  «Որտե՞ղ եք տեսել, որ գրողը հայրենասեր լինի: Նա պետք է գրի ամեն բանի մասին, ինչ նրա սիրտն ու բանականությունն են թելադրում: Ազգայնականությունը  և հայրենասիրությունը չպետք է ուղեկցեն ստեղծագործող մարդկանց»,- ասել է նա: