Ֆիննախի որոշման պատճառով Գիտպետկոմի նախագահը մեկ ամիս չի քնել

Գիտության պետական կոմիտեի նախագահ Սամվել Հարությունյանն այսօր լրագրողներին էր ներկայացնում ԿԳ նախարարության ենթակայության ներքո գործող գերատեսչության առաջիկա 5 տարիների ռազմավարական պլանը: Ըստ այդ փաստաթղթի` առաջիկա 5 տարում գիտությունը պետք է թռիչքաձև վերելք ապրի: Ներկայացված հաղորդագրության մեջ անդրադարձ կար նաև այս օրերին գիտնականների զգայարանների հետ «խաղացած»` բազային հիմնադրամների ֆինանսավորման դրույթին: Գիտպետկոմն իր վերադաս նախարարության հետ համատեղ օրենսդրական նոր փաթեթ է նախաձեռնում, որը պետք է կարգավորի բազային հիմունքներով հիմնադրամների ֆիանսավորումը: Հարությունյանը, ըստ էության, հաստատեց ԿԳ նախարարի երեկվա միտքը,  այն է` բազային հիմքով հիմնադրամները գուցե եկող տարվանից ֆինանսավորվեն վարկանիշային եղանակով:

«Պատրաստում ենք նոր` ռեյտինգային ֆինանսավորման կարգ, այն արդեն պատրաստ է, ու մոտ ժամանակներս մեր կայքում կտեղադրենք: Նախագիծը գիտնականների շրջանում լայն քննարկում անցնելուց հետո նոր միայն կառավարության հաստատմանը կներկայացվի»,- ասաց նա:

Բանախոսը մտահոգություն հայտնեց, որ գիտության պատասխանատու ոլորտները բազմազան են, ու երբ հարցեր են  առաջանում, կառավարությունը չի կարողանում կողմնորոշվել, թե ում պետք է հարցում ուղարկի` կարծիք իմանալու համար: ԿԳ նախարարը ևս, ըստ Հարությունյանի, անհանգստացած է այդ հարցով, որին օր առաջ պետք է  լուծում տալ: «Պետք է հստակ սահմանվի` ով է գիտության պատասխանատուն այս երկրում, և հետո նոր պահանջներ ներկայացվեն: Բացի այդ` ոլորտային խնդիրները պետք է ոլորտային նախարարության կողմից ներկայացվեն, այլ ոչ թե` ֆինանսների նախարարության»,- ընդգծեց Գիտպետկոմի ղեկավարը:

«Իսկ երբ ֆինանսների նախարարությունը դեկտեմբերի 27-ին ընդունված 1515 N որոշման նախագիծը տեղադրել է e-gov  կայքում, ինչո՞ւ չէիք բարձրաձայնում այդ խնդրի մասին»,- միջամտեց Yerkir.am-ի լրագրողը: «Ես մեկ ամիս չեմ քնում դրա պատճառով, ես զարմացած եմ, թե ինչու է այդպիսի բան եղել: Մենք ԿԳ նախարարի հետ պայմանավորվել ենք, հոկտեմբերի ամսին ստեղծվել է հանձնաժողով, որը պետք է զբաղվի վարկանիշային կարգի մշակմամբ: 2018-ի հոկտեմբերի 9-ին նախարարի հրամանով ստեղծվել է հանձնաժողով, որը պետք է զբաղվեր ռեյտինգային ֆինանսավորման չափորոշիչների մշակմամբ: Ենթադրվում էր, որ ամռանն ավարտելու ենք նախագծի աշխատանքներն ու այն ներկայացնենք կառավարության հաստատմանը: Բայց մեկ էլ դեկտեմբերի 27-ին որոշում է լինում... Ես ապշել էի այդ որոշումից»,- պատասխանեց նա:

Սամվել Հարությունյանը, շարունակելով պատասխանել մեր հարցին, ասաց նաև, որ դեկտեմբերի 27-ի աղմկահարույց որոշումից առաջ բանավոր քննարկում են ունեցել ֆիննախի հետ, որին մասնակցել է Գիտպետկոմի տնօրենի տեղակալը, և այդ ժամանակ իրենք բացասական պատասխան են տվել: «Կարծիք հայտնելու համար մեզ գրավոր հարցում չեն ուղարկել, եթե ուղարկեին, ես բացասական կարծիք պետք է տայի»,- Yerkir.am-ի հարցին պատասխանն այսպես ամփոփեց բանախոսը:

Վրույր Սևակ