Այս պահին էր ժամանակը հասունացել. Դավիթ Սարգսյանը` ՊԵԿ-ի ու ֆիննախի միավորման մասին

Ֆինանսների նախկին նախարար Դավիթ Սարգսյանը շատ ճիշտ և դրական քայլ է համարում ՊԵԿ-ի և ֆինանսների նախարարության միավորումը: Դիտարկմանը, թե ինչու հենց հիմա տեղի ունեցավ այդ միացումը, նա պատասխանեց. «Ժամանակը հասունացել է այս պահին, և քայլն իրականացվել է»:

Անդրադառնալով Գագիկ  Խաչատրյանին` որպես մասնագետի, Դավիթ Սարգսյանը վստահեցրեց, որ նրան շատ դրական է վերաբերվում, և շատ ճիշտ էր նրա նշանակումը:

«Վերջին մեկ ամսվա ընթացքում բոլոր քայլերն իրականացվել են շատ ճիշտ, տեղին և ժամանակին»,- հայտարարեց նա:

Դիտարկմանը, թե Գագիկ Խաչատրյանը բիզնեսմեն է, Դավիթ Սարգսյանը պատասխանեց, որ դա փաստող որևէ ապացույց չկա: Անդրադառնալով կառավարության  ջանքերին` ստվերը կրճատելու հարցում, նա  նշեց, որ իրենք էլ են ջանքեր գործադրել, բայց հարցը մեկ գիշերում հնարավոր չէ լուծել: Նաեւ հայտարարեց, որ իր կամքով է հրաժարական ներկայացրել և շուտով անցնելու է նոր աշխատանքի: Իսկ թե ինչ աշխատանքի, Դավիթ Սարգսյանը չմանրամասնեց: