Ուղղությունը` մայրաքաղաքից հայրաքաղաք. գործարկվում է նոր էլեկտրագնացք

2019-ի մարտից Երևան-Գյումրի-Երևան երթուղով  ուղևորափոխադրումներ կիրականացնի երկրորդ նոր էլեկտրագնացքը: Այն կունենա 120 տեղ և կհամապատասխանի ժամանակակից չափորոշիչներին: 

Yerkir.am-ի հետ զրույցում «Հարավկովկասյան երկաթուղի» ՓԲԸ-ի մամուլի խոսնակ Ռուբեն Գրձելյանը հայտնեց, որ գնացքները դեռ նոր են բերվել: «Հստակ գրաֆիկ դեռևս չկա, բայց ենթադրվում է`ուղևորափոխադրումներ կիրականացվեն ամեն օր: Տոմսի գինը կմնա անփոփոխ`2500 ՀՀ դրամ»,- ասաց նա: 

Հավելենք, որ 2018 թվականին ՀԿԵ շարժակազմի արդիականացման ներդրումային ծրագրի շրջանակներում գնվել էր 2 նոր էլեկտրագնացք և 40 նոր կիսավագոն: Կիսավագոններն այժմ շահագործվում են պղնձի խտանյութի արտահանման համար: