Խնդիրներից մեկը բնակչությանը մատուցվող ծառայությունների որակի շարունակական բարձրացումն է լինելու. Արցախի արդարադատության նախարար

Հունվարի 25-ին կայացել է ԱՀ արդարադատության նախարար Արարատ Դանիելյանի մամլո ասուլիսը, որի ժամանակ նախարարը ներկայացրել է 2018 թվականին արդարադատության նախարարության եւ նրա ստորաբաժանումների գործունեության հաշվետվությունը:

Նախարարը նախ անդրադարձել է շարունակական բնույթ կրող ԱՀ օրենսդրությանկատարելագործման, դատաիրավական համակարգի եւ իրավակիրառական պրակտիկայի բարեփոխման ուղղությամբ տարվող աշխատանքներին:

«2018 թվականին նախարարության առջեւ դրված կարեւորագույն խնդիրներից է հանդիսացել մարդու իրավունքների եւ ազատությունների արդյունավետ պաշտպանության իրականացումը, բնակչությանը մատուցվող ծառայությունների որակի բարձրացումը  եւ համակարգի ստորաբաժանումների գործունեության բարելավումը»,- նշել է նախարարը:

 Խոսելով 2019 թվականին նախատեսվող միջոցառումների մասին՝ Ա.Դանիելյանը նշել է, որ նախարարության խնդիրներից մեկը բնակչությանը մատուցվող ծառայությունների որակի շարունակական բարձրացումն է լինելու. «Շարունակվելու են աշխատանքներն՝ ուղղված նոտարիատի, քաղաքացիական կացության ակտերի եւ իրավաբանական անձանց պետական գրանցման, դատական ակտերի հարկադիր կատարման ոլորտներում վարչարարության արդյունավետության բարձրացման ուղղությամբ»: