Հայաստանը` հավաքական միայնության մեջ. Պուտինը հանդիպել է Զասի հետ. Коммерсантъ

ՀԱՊԿ անդամ 6 պետություններից հինգը պաշտոնապես աջակցել են Բելառուսի Անվտանգության խորհրդի պետքարտուղար Ստանիսլավ Զասի թեկնածությանը ՀԱՊԿ գլխավոր քարտուղարի պաշտոնում: «Իր դիրքորոշումը չի հայտնել միայն Երևանը»,- գրում է Коммерсантъ-ը` նշելով, որ ՌԴ ԱԳՆ-ում աղբյուրները հայտնել են, որ հարցը վերջնականապես կլուծվի դեկտեմբերի 27-ին կայանալիք Պուտին-Փաշինյան հանդիպման ժամանակ:

«Հայաստանը` հավաքական միայնության մեջ» վերնագրով նյութում ասվում է, որ Զասի թեկնածությանը հավանություն  է տվել նաև Ռուսաստանը, Վլադիմիր Պուտինի հետ հանդիպումը կայացել է դեկտեմբերի 18-ին, սակայն Կրեմլի կայքում պաշտոնական հաղորդագրություն չկա:

Հիշեցնենք, որ Ղրղզստանի, Տաջիկստանի, Ղազախստանի և Բելառուսի նախագահները նույնպես ավելի վաղ իրենց աջակցություն են հայտնել Զասի թեկնածությանը:

ՀԱՊԿ քարտուղարության մամուլի խոսնակ Վլադիմիր Զայնետդինովը թերթի հետ զրույցում հայտնել է, որ Զասին նշանակելու մասին որոշման նախագիծն ուղարկվել է ՀԱՊԿ մշտական խորհրդի անդամներին` անդամ պետություններում դիտարկման համար: