Այս պահի դրությամբ Ստանիսլավ Զասի այց Հայաստան չի ծրագրվում. ՀՀ ԱԳՆ մամուլի խոսնակ

Պետք է արձանագրենք, որ այս պահի դրությամբ ՀԱՊԿ գլխավոր քարտուղարի հարցին վերջնական լուծում չի տրվել, որ կարողանանք կարծիք հայտնել: Այս մասին լրագրողների հետ ճեպազրույցում ասաց ՀՀ արտաքին գործերի նախարարության մամուլի խոսնակ Աննա Նաղդալյանը:

«Գործընթացն ընթանում է ՀԱՊԿ գլխավոր քարտուղարի ընտրության շուրջ, հարցը դեռ վերջնական լուծում չի ստացել»,- նշեց նա:

Հարցին, թե առաջիկայում Ստանիսլավ Զասի այց Հայաստան նախատեսվո՞ւմ է, Աննա Նաղդալյանը պատասխանեց. «Այս պահի դրությամբ Բելառուսի անվտանգության խորհրդի քարտուղար Ստանիսլավ Զասի այց Հայաստան չի ծրագրվում»:

Հիշեցնենք, որ Բելառուսի անվտանգության խորհրդի քարտուղար Ստանիսլավ Զասը այցելություններ է կատարել ՀԱՊԿ անդամ երեք երկրներ՝ Ղազախստան, Տաջիկստան, Ղրղզստան: Երեք երկրների ղեկավարներն էլ իրենց աջակցությունն են հայտնել ՀԱՊԿ գլխավոր քարտուղարի պաշտոնում Բելառուսի թեկնածու Ստանիսլավ Զասին:

Ինչ վերաբերում է Ադրբեջանի նախագահ Իլհամ Ալիևի կարգադրությանը, որի համաձայն`  հայ-ադրբեջանական սահմանի որոշ հատվածներում Ադրբեջանը պատրաստվում է սահմանային հսկողությունը զինված ուժերի ստորաբաժանումներից փոխանցել սահմանապահ ծառայությանը, մասնավորապես` Ղազախի և Աղստաֆի շրջաններում, ՀՀ ԱԳՆ խոսնակը նշեց, որ այդ առնչությամբ հայտարարություն անելը դեռ վաղ է: