Վաչագան Ղազարյանի պաշտպանները կալանքի հարցը քննող դատավորին ինքնաբացարկ են հայտնել

Այսօր Երևանի ընդհանուր իրավասության դատարանում քննել են Սերժ Սարգսյանի թիկնազորի նախկին պետ  Վաչագան Ղազարյանի խափանման միջոցի վերաբերյալ  գործը։

Պաշտպանական կողմը ինքնաբացարկի միջնորդություն է ներկայացրել դատավոր Ռոբերտ Պապոյանին։ Դատարանը հեռացել է խորհրդակցական սենյակ՝ միջնորդության վերաբերյալ որոշում կայացնելու։ Վաչագան Ղազարյանի կալանքը երկարացնելու հարցի քննությունն ավարտվեց: Դատավորը իրեն ներկայացված ինքնաբացարկի միջնորդությունը մերժել է և շարունակել գործի քննությունը, որի ընթացքում քննվել է Հատուկ քննչական ծառայության  միջնորդությունը՝ Ղազարյանի նկատմամբ ընտրված խափանման միջոց կալանավորումը երկարաձգելու վերաբերյալ:

Հիշեցնենք, որ ՀՔԾ-ն Վաչագան Ղազարյանին մեղադրանք է առաջադրել  ապօրինի հարստացման և դրամական միջոցները թաքցնելու մեջ:

Նշենք նաև, որ այսօր  Վաչագան Ղազարյանը հանդես է եկել հայտարարությամբ՝ նշելով, որ պատրաստ է 6 մլն դոլարի չափով դրամական միջոցները փոխանցել պետությանը: