Քոչարյանի կալանավորումը ոչ մի ազդեցություն չի ունեցել «Իմ քայլի» հավաքած ձայների վրա. ռուս քաղաքագետներ

ՀՀ ԱԺ արտահերթ ընտրությունները վերջնագիծ դրեցին ՀՀ-ում երկիշխանության վրա. Երևան-Մոսկվա տեսակամրջի ժամանակ ասաց ՌԳԱ համաշխարհային տնտեսության և միջազգային հարաբերությունների ինստիտուտի գլխավոր գիտաշխատող, Կովկասագետների գիտական միության նախագահ Ալեքսանդր Կռիլովը՝ նշելով, որ  ընտրությունների արդյունքները, ընդհանուր առմամբ, կանխատեսելի էին` փորձագետները սպասում էին, որ ՀՀ վարչապետի պաշտոնակատար Նիկոլ Փաշինյանի դաշինքը կստանա ձայների շուրջ 70%–ը։

Փորձագետը  համաձայն չէ այն պնդումներին, թե ընտրողների  ցածր մասնակցությունը վկայում է Փաշինյանին աջակցելու ցածր աստիճանի մասին։ Նրա կարծիքով` նախորդ ընտրություններին ընտրողների մասնակցության ցուցանիշն ակնհայտորեն ուռճացվում էր: Միաժամանակ, Կռիլովը նշում է, որ փոքր-ինչ  անսպասելի էր, որ ՀՀԿ-ն և «Սասնա ծռերը» չանցան ապագա խորհրդարան, ինչը վկայում է ՀՀ-ում քաղաքական էլիտայի փոփոխման մասին. քաղաքական դաշտում նոր կուսակցություններ, ինչպես նաև երիտասարդ քաղաքական գործիչներ են հայտնվում:   

ՌԳԱ արևելագիտության ինստիտուտի Կովկասի ուսումնասիրության կենտրոնի ավագ գիտաշխատող Անդրեյ Արեշևի համար չափազանց ուրախալի է փաստը, որ ծայրահեղ մոտեցումներ ունեցող «Սասնա ծռեր» կուսակցությունը չանցավ նոր խորհրդարան: Ըստ նրա՝  դա հենց «Սասնա ծռերի» «շնորհիվ» է,  քանի որ  չկարողացան  համոզիչ հանդես գալ  քարոզարշավի ընթացքում, երկրորդ՝ սա ցույց է տալիս ՀՀ-ում վերաբերմունքը ռադիկալ կոչեր անողների հանդեպ: «Նրանք հազիվ 2 տոկոս են հավաքել, այսքան է նրանց, նրանց ծրագրի  պոպուլյարությունը ՀՀ-ում»,- շեշտեց քաղաքագետը:

Արեշևը նաև ընդգծեց`  «Իմ քայլի» հավաքած 70.44%-ը տրամաբանության շրջանակում է:

Ե'վ Արեշև, և' Կռիլովը պնդեցին, որ ՀՀ երկրորդ նախագահ Ռոբերտ Քոչարյանի կալանավորումը ոչ մի ազդեցություն չի ունեցել Նիկոլ Փաշինյանի քաղաքական ուժի օգտին գրանցված քվեների վրա: «Կլիներ այդ կալանավորումը, թե՝ ոչ, քվեարկածների թիվը չէր փոխվի: Ուղիղ կապ չկա. Քոչարյանի գործն իր հունով է գնում, ընտրություններն իրենց հունով գնացին»,- ասաց Կռիլովը՝ խոստովանելով, որ հեղափոխության առաջին օրերին ՌԴ-ում թերահավատորեն էին տրամադրված, մտավախություն կար, որ կկրկնվի նույն սցենարը, ինչ Վրաստանում և Ուկրաինայում, բայց մտավախությունները չհաստատվեցին:

«Դժվար է պատկերացնել, որ ինչ-որ մեկը պատրաստվում  էր իր ձայնը տալ այլ ուժի, և կալանավորումից հետո որոշեց իր ձայնը տալ «Իմ քայլին»»,- հավելեց Արեշևը՝ նշելով, որ Ռոբերտ Քոչարյանը փորձառու քաղաքական գործիչ է և  կարողանում է դիմակայել հարվածին, նաև` երկրորդ նախագահը  չէր պատրաստվում վերադառնալ քաղաքականություն, բայց, հանգամանքների բերումով և իր կամքից անկախ, նա վերադարձավ քաղաքական բաց հարթակ: