Պետպատվեր տրամադրելիս բուժհաստատություններն ունենալու են հավասար պայմաններ. Թորոսյան

2019 թվականի պետական բյուջեի նախագծի քննարկման ժամանակ առողջապահության նախարարի պաշտոնակատար Արսեն Թորոսյանը տեղեկացրեց, որ նախարարությունը փոխելու է բուժհաստատություններին պետպատվերի գումարների տրամադրման եղանակները:

ԱԺ «Ելք» խմբայկցության պատգամավոր Հովիկ Աղազարյանը հետաքրքրվեց. «Անցյալում տարվա սկզբի համար նախատեսված է եղել այս կամ այն բուժհաստատությանը հատկացնել պետպատվերի համար որոշակի գումար, Դուք պահպանելո՞ւ եք այս սկզբունքը, թե՞ այլ մոտեցում եք ցուցաբերելու»:

Թորոսյանը պատասխանեց, որ, այո, պետպատվերի բաշխման սկզբունքը դա է եղել, և այդ գումարները տրամադրելու պայմանագրերը կնքվել են բուժհաստատությունների հետ տարվա սկզբին` տարբեր սկզբունքների հիման վրա: «Հիմնական սկզբունքը, որը մինչև հիմա գործել է, նախորդ տարվա գումարներն են եղել` պլյուս մինուս մի քանի տոկոս»,- ասաց նա:

Թորոսյանը նշեց, որ նախարարությունը պատրաստվում է պետպատվերի գումարների տրամադրման տրամաբանությունը փոխել: «Մենք այդ տրամադրվող գումարը կապելու ենք որոշ ծառայությունների գծով գումարների չափի հետ` նմանատիպ ծառայությունների գծով վճարովի ծառայությունների հետ, որովհետև վճարովի ծառայությունների թիվը այս կամ այն բուժհաստատության որակի ցուցիչ է: Չի ստացվելու այնպես, որ բուժհաստատություններն ունենան անհավասար պայմաններ պետական միջոցներից օգտվելու հարցում: Հնարավոր է, որ պայմանագրերը կնքվեն ոչ թե մեկ տարով, այլ կարճատև և տարվա ընթացքում վերանայվեն` կապված այդ բուժհաստատությունների վճարովի ծառայությունների հետ: Իհարկե, հիմնականում դրանք կվերաբերեն սոցիալապես անապահով անձանց և հավանաբար զինծառայողներին մատուցվող ծառայություններին»,- ասաց նա և հավելեց, որ նաև կիրառվելու է սպասարկվող բնակչության թվի սկզբունքը: Օրինակ` մարզային բուժհաստատությունների դեպքում, քանի որ մարզերում փաստացի մրցակցություն չկա, և հիմնականում մեկ բուժհիմնարկ է, նրանց տրվող միջոցները որոշվելու են բնակչության թվով: «Այս տարի վերաբաշխման ժամանակ այդ սկզբունքն արդեն կիրառել ենք և ապակենտրոնացված վերաբաշխում արել, հիմնականում` Երևանից դեպի մարզեր, ինչը թույլ է տալիս մարզերի բնակիչներին ծառայություն ստանալ հենց տեղերում»,- եզրափակեց Թորոսյանը: