Ես Աֆրիկյանների կառույցին ձեռք չէի տա. Արթուր Մեսչյան

Էթիկական հարց կա՝ չէի ուզի բողոքել Երևանի նախկին ճարտարապետ Նարեկ Սարգսյանից. լրագրողների հետ հանդիպման ժամանակ ասաց Երևանի գլխավոր ճարտարապետ Արթուր Մեսչյանը:

 

Նա նշեց, որ, օրինակ, բոլորը բողոքում են Հյուսիսային պողոտայից, բայց բողոքողների մեծ մասը երեկոյան զբոսնում է այնտեղ: Հյուսիսային պողոտան, ըստ Մեսչյանի, դարձել է Երևանի ամենասիրելի տեղերից մեկը: «Այսինքն՝ Նարեկ Սարգսյանի դեմ լարվածությունը, որը սկսվել է Հյուսիսային պողոտայից, ինձ համար հասկանալի չէ: Ինձ համար հասկանալի կլիներ, եթե այդ փողոցով ոչ ոք չքայլեր, բոլորն ասեին՝ ֆու, էս ինչ է: Երբ ես գլխավոր ճարտարապետ էի, որը տևեց շատ կարճ, հրահանգ տրվեց Հյուսիային պողոտայի բոլոր տարածքները վաճառել: Ես դա կանգնեցրեցի ու քաղաքապետին՝ Վանո Սիրադեղյանին, ասացի, որ չի կարելի քաղաքի կենտրոնի ամենակարևոր մասը դնել աճուրդի ու տարածքներ վաճառել: Միակ բանը, որ ես արեցի՝ վաճառքը կասեցնելն էր, իսկ Նարեկ Սարգսյանին հաջողվեց հավաքել կառուցապատողների այն ցուցակը, որոնց շնորհիվ էլ կառուցվեց այդ փողոցը»,- ասաց Մեսչյանը՝ հավելելով, որ կան մարդիկ, որ կհավանեն Հյուսիսային պողոտան, իհարկե, կլինեն մարդիկ էլ, որ չեն հավանի: «Ինչ վերաբերում է այդ տարածքի նախկին բնակիչներին, ապա ես ոչինչ ասել չեմ կարող. այդ ժամանակ ես Հայաստանում էլ չէի»,- նշեց նա:

 

Ըստ Մեսչյանի` ինքն առաջին գլխավոր ճարտարապետն է լինելու, որը Երևանի սահմաններում ոչ մի նախագիծ չի իրականացնելու, քանի որ ամեն ինչ իր ձեռքում է: «Ես ուզում եմ ազնիվ լինել ճարտարապետների առաջ, իմ գործընկերները կիմանան, որ չեմ չարաշահելու իմ աշխատանքը, և ավելի կհեշտանա մեր աշխատանքը: Այսինքն՝ ես դառնում եմ ոչ թե նրանց ղեկավարը, այլ կոլեգան: Դուք մի մտածեք, որ չեմ ուզում իրականացնել նախագծեր, ոչ, դա իմ կյանքն է, ես դրանով ապրում եմ, բայց եթե ես այս պատասխանատվությունն եմ ստանձնել, պետք է այդ հաճույքից ինձ զրկեմ»,- ասաց նա:

 

Մեղչյանը նաև տեղեկացրեց, որ Աֆրիկյանների շենքի բոլոր քարերը պահպանվել են, և այդ առումով ինքը հանգիստ է, թեև տխուր է, որ քանդեցին այն: Նրա խոսքով՝ ինքն Աֆրիկյանների կառույցին ձեռք չէր տա, ավելի շուտ կքանդեր դիմացի շենքը: