Ովքեր ապօրինի կառուցապատում են իրականացրել կանաչ տարածքներում, նրանց չեմ նախանձում. Արթուր Մեսչյան

Տեղեկացրել էինք, որ այսօր լրագրողների հետ հանդիպեց Երևանի գլխավոր ճարտարապետ Արթուր Մեսչյանը:

Yerkir.am-ը հետաքրքրվեց, թե ի՞նչ ծրագիր ունի Մեսչյանը Երևանի կենտրոնում տարիներ շարունակ այդպես էլ չլցվող «փոսերի» հետ կապված, այն տարածքների, որտեղ շինարարությունը կարծես սկսվել ու տարիներ ի վեր կանգ է առել, օրինակ` «Մոսկվա» կինոթատրոնի մոտ առկա «փոսը»:

Ի պատասխան Մեսչյանը նշեց, որ, այո, Երևանում կան ահռելի քանակով շինհրապարակներ, և իր կարծիքով՝ արդեն իսկ եկել է ժամանակը, որ բոլոր սեփականատերերի առջև դրվի խնդիր՝  այս հողը վերցրել եք, մի բան արեք: «Պետք է գտնենք ճանապարհներ, որ այդ հողատարածքները տրվեն այն կառուցապատողներին, որոնք կարողանան այդ տարածքներում, ի վերջո, կատարել շինարարական աշխատանք, և մենք այդ փոշուց դուրս գանք: Կան շատ հողատարածքներ, որոնք կիսաշինարարական վիճակում մնացել են մեր քաղաքի սրտում: Դրանք պետք է վերացնել, քանի որ ժամանակը եկավ, և դրանց համը դուրս է եկել»,-ասաց նա:  

Մեսչյանի խոսքով՝ իր համար ողբերգություն է, երբ ապօրինի շինարարությունը կատարվում է հողազավթումով: Այս հարցում, ըստ նրա, իրենք լինելու են սարսափելի խիստ: «Բոլոր սրճարանների սեփականատերերին եմ ուղղում խոսքս՝ նրանք, ովքեր վերջին ժամանակներում իրենց տրամադրված սահմաններից դուրս են եկել ու զբաղեցրել այլ տարածքներ, խնդրում եմ՝ մինչև գարուն բոլորդ վերադարձեք ձեզ տրամադրված սահմանները: Հակառակ դեպքում՝ ունենալու եք խնդիր, մեծ խնդիրներ: Երևանի կենտրոնում կանաչ տարածությունների պահպանման հանդեպ շատ խիստ ենք լինելու: Նրանք, ովքեր ապօրինի կառուցապատում են իրականացրել կանաչ տարածքների մեջ, նրանց չեմ նախանձում»,- ասաց Երևանի գլխավոր քաղաքապետը:

Հետաքրքրվեցինք նաև, թե ինչ է լինելու Ֆիրդուսիի տոնավաճառի, փողոցի բնակիչների խնդիրը, քանի որ այդ տարածքում էլ գերակա շահ են համարվել մի շարք տներ, որոնք քանդվել են, բայց տեղում կառուցապատում չի իրականացվում: Ի պատասխան Մեսչյանը նշեց, որ Ֆիրդուսի վերաբերյալ լավ նորությունն այն է, որ արդեն իսկ կառուցապատողները հայտնվել են, որոնք պատրաստ են սկսել շինարարությունը: «Ինձ անհանգստացնում են տեղի բնակիչները, որ հայտնվել են տարօրինակ իրավիճակում: Բայց դա ժառանգություն է, որն ուղղակի հասել է ինձ: Ամեն դեպքում` ես պետք է հասնեմ նրան, որ այդ տարածքի շինարարությունն արագանա և բնակիչների հարցն արագ լուծվի»,- ասաց նա:

Հարցին, թե դա հրապարակի տեսքը չի՞ խաթարի, Մեսչյանը պատասխանեց, որ հրապարակի տեսքն այնքան է փոխվել, որ ասելու չէ: «Ամենազարմանալին այն է, որ Ազգային պատկերասրահի հետևի հատվածում շինարարություն է կատարվում, և այնտեղ բաներ են արվում, որ շատ վտանգավոր են: Ցավոք, բնակելի հատվածն արդեն իսկ կառուցված է, բայց ձախ հատվածի այն սիրուն կառույցը, բայց ինչպես ասում էին` «ախոռը», որ քանդեցին, անհասկանալի վիճակում է: Պետք է փորձենք տրամաբանական լուծում տալ այս խնդրին»,- ասաց նա: