Տարեցտարի պետք է կրճատել արտագնա աշխատանքի մեկնողների թիվը. Գեղարքունիքի նորանշանակ մարզպետ

Այսօր՝ կառավարության նիստից հետո, Գեղարքունիքի նորանշանակ մարզպետ Գնել Սանոսյանը, ով մինչ այս աշխատել է որպես բնապահպանության նախարարի տեղակալ, լրագրողների հետ զրույցում անդրադարձավ առաջիկա անելիքներին:

Նրա կարծիքով` բնապահպանական խնդիրներին տեղյակ լինելը կօգնի իրեն արդեն մարզպետի կարգավիճակում լուծել դրանք, մասնավորապես՝ Սևանա լճի հետ կապված խնդիրները: Կա նաև մարզի համաչափ զարգացման խնդիր, արտագնա աշխատանքի խնդիր, չնայած արտագնա աշխատանքի մեկնողների 90 տոկոսը սեզոնային աշխատանքի ավարտից հետո վերադառնում է իր բնակավայրը:

Մարզպետը հույս հայտնեց, որ տարեցտարի կկրճատվի արտագնա աշխատանքի մեկնողների թիվը: Ինչ վերաբերում է կադրային հարցերին, նրա խոսքով, ծանոթ-բարեկամի հանգամանք չի լինելու, այդ դարաշրջանն ավարտվել է: «Կադրային ջարդ չի լինելու, բայց փոփոխություններ կլինեն»,- ասաց  Սանոսյանը: