Վրաստանում ռուս լրագրողներին թույլ չեն տվել ամերիկյան Լուգարի կենտրոն այցելել

Վրաստանի հիվանդությունների և հանրային առողջության վերահսկողության ազգային կենտրոնի գիտական խորհրդի ղեկավար Պաատա Իմնաձեն մերժել է ռուսական լրատվամիջոցների լրագրողների` Թբիլիսիում գտնվող Լուգարի լաբորատորիա մուտք գործելու դիմումը. հայտնում է РИА Новости-ն: Միևնույն ժամանակ, վրացի լրագրողներին թույլ են տվել այցելել կենտրոն:

Իմնաձեն նշել է, որ ռուս լրագրողները չեն մտնի լաբորատորիա, քանի որ ռուսական ԶԼՄ-ները բազմիցս հրաժարվել են հրապարակել վրացական կողմի` իրենց տարածած տեղեկությունների մասին հերքումները:

Երեկ հայտնել ենք, որ  ՌԴ ԶՈՒ ռադիացիոն, քիմիական և կենսաբանական պաշտպանության զորքերի ղեկավար Իգոր Կիրիլովը հայտնել է, որ Վրաստանի քաղաքացիների վրա ԱՄՆ ՊՆ նախկին ղեկավար Դոնալդ Ռամսֆելդի ընկերության արտադրած դեղամիջոցի փորձարկման հետևանքով 2015-ին մահացել է 24 մարդ, իսկ ավելի ուշ` ևս 49-ը:

Ավելի վաղ Վրաստանի պետական անվտանգության նախկին նախարար Իգոր Գիորգաձեն Մոսկվայում մամուլի ասուլիսի ժամանակ հայտարարել էր, որ դիմել է ԱՄՆ նախագահին` խնդրելով հետաքննել Ռիչարդ Լուգարդի անվան լաբորատորիայի գործունեությունը Վրաստանում, որը, ինչպես նա պնդում է, կարող է մահաբեր հետևանքով փորձարկումներ իրականացնել մարդկանց վրա: Նա տվյալներ էր ներկայացրել 2015-ին գրանցված 30 մահվան մասին. մարդիկ լաբորատորիայում բուժում էին ստանում հեպատիտ C-ի դեմ: