Известия-ի լրագրողներին թույլ չեն տվել մուտք գործել Մոլդովա

Ռուսական Известия պարբերականի լրագրողներին թույլ չեն տվել մուտք գործել Մոլդովա: Նրանք վերադարձել են Սանկտ Պետերբուրգ: Այդ մասին հայտնում է РИА Новости-ն` պարբերականի մամուլի ծառայությանը հղումով:

Նշենք, որ Մոլդովայում քաղաքական ճգնաժամ է:

Մոլդովայի սոցիալիստների կուսակցությունը, որը ռուսամետ է, և եվրոպամետ ACUM դաշինքը շաբաթ օրը խորհրդարանական մեծամասնություն են կազմել և երկիրը 3 ամիս սպասումից հետո նոր կառավարություն է ստացել: Երկրի Սահմանադրական դատարանը այդ որոշումն անօրինական է համարել: Կիրակի օրը Պավել Ֆիլիպը, որին դատարանը նշանակել է երկրի ժամանակավոր ղեկավար, հրաման է ստորագրել խորհրդարանի ցրման և սեպտեմբերի 6-ին ընտրություններ անցկացնելու մասին:

Նոր կառավարությունը հայտարարել է, որ մինչ այդ իշխող Դեմոկրատական կուսակցությունը ցանկանում է դատավորների միջոցով ուզուրպացնել իշխանությունը: