«Նախորդ իշխանությունները չկան, ինչո՞ւ է թանկացել մաքսազերծումը». բողոքում են առեւտրականները

Մոտ մեկ ժամ է, ինչ կառավարության շենքի առջև «Առինջ մոլ»-ի, «Մալաթիա» եւ այլ տոնավաճառների առեւտրականները բողոքի ակցիա են իրականացնում մաքսազերծման աճող գների դեմ. նախկին 3 դոլարի փոխարեն այժմ 4.3 դոլար են վճարում:

««Նորֆոլկ» ֆիրմա էր գործում, նա էր ռաստամոժկա անում: Ու բավականին լուրջ գումարներ էր տանում Հայաստանից: Հիմա այդ ֆիրման արդեն չկա, բայց գինն ա թանկացել 3 դոլարով: Հիմա թղթաբանությունն էնքան են շատացրել, որ մտածում ես՝ էս գործն անե՞ս, թե՞ չէ: Հայաստանում 30-40 հազար ընտանիք զբաղվում ա մանր առևտրով, ու տարիքով մեծ մարդիկ են հիմնականում: Իրենք ո՞նց պիտի էդքան թղթաբանություն անեն»,- www.yerkir.am-ի հետ զրույցում իր մտահոգությունը հայտնեց առևտրական Արսեն Գրիգորյանը:

Առևտրականները կարծում են, որ վարչապետ Փաշինյանը տեղյակ չէ այս ամենից, և իրենք դեռևս չեն բողոքում, այլ տեղեկացում են:

Առևտրականներից ոմանք վստահ են, որ նախկինում իշխանությունները «փայ էին մտնում», հիմա նրանք չկան, բայց մաքսազերծման գինն աճում է: «Ո՞ւմ հաշվին է թանկանում մաքսազերծման արժեքը»,- հարցրեց նրանից մեկը, ով չցանկացավ ներկայանալ: