Արցախի ԱԺ փոխնախագահը Լիբանանում այցելել է «Ազդակ» օրաթերթ

Արցախի Հանրապետության Ազգային ժողովի փոխնախագահ Վահրամ Բալայանը Լիբանանում այցելել է «Ազդակ» օրաթերթ:

Ըստ Aztagdaily-ի` այցի ընթացքում Բալայանին ընկերակցել են Հայ Դատի Լիբանանի հանձնախմբի անդամներ։

Թերթի տնօրինության հետ կայացած հանդիպման ընթացքում Վահրամ Բալայանը ներկայացրել է Արցախին առնչվող ներքին եւ արտաքին գործընթացները։ Ուշադրություն է նաև կենտրոնացվել տեղեկատվական ոլորտի, հատկապես` Արցախի եւ Սփյուռքի  լրատվամիջոցների միջև իրականացվող համագործակցությանը:

Արցախի Ազգային ժողովի փոխնախագահը բարձր է գնահատել «Ազդակ»-ի կատարած աշխատանքը հակամարտության եւ ընդհանրապես Արցախի Հանրապետության հետ առնչվող իրադարձությունների լուսաբանման ուղղությամբ:

Նշենք, որ Բալայանը Լիբանանում է ՀՅԴ Լիբանանի Հայ Դատի հանձնախմբի հրավերով` Արցախի Հանրապետության օրվա առիթով կազմակերպված միջոցառմանը բանախոսելու համար: