Գրավի դիմաց ազատ արձակված` ՔԿ նախկին պաշտոնյան դարձյալ կկալանավորվի

Քրեական հեղինակություն Ալավերդցի Վահագնի` Վահագն Աբգարյանի գործով մի քանի շաբաթ առաջ գրավի դիմաց ազատ արձակված` Լոռու մարզի քննչական վարչության նախկին պետ Թաթուլ Շուշանյանը կրկին կկալանավորվի: Նման որոշում այսօր կայացրել է ՀՀ վերաքննիչ քրեական դատարանը` բավարարելով մեղադրող դատախազի և գործով տուժող` սպանված Կամո Փիրուզյանի ներկայացուցիչների բողոքը:  

Yerkir.am-ի հետ զրույցում տուժողի իրավահաջորդի ներկայացուցիչներից Երվանդ Վարոսյանը նշեց, որ Շուշանյանին կտեղափոխեն «Վարդաշեն» ՔԿՀ:

Հիշեցնենք, որ մայիսի 30-ին Երևան քաղաքի ընդհանուր իրավասության դատարանի դատավոր Տաթևիկ Գրիգորյանը, բավարարելով ՀՀ ՔԿ Լոռու մարզային քննչական վաչության նախկին պետ, առանձնապես խոշոր չափերով կաշառք ստանալու և պաշտոնական լիազորությունները չարաշահելու համար մեղադրվող Թաթուլ Շուշանյանի պաշտպանի միջնորդությունը՝ որոշում էր կայացրել նրա նկատմամբ որպես խափանման միջոց ընտրված կալանավորումը այլընտրանքային խափանման միջոց գրավով փոխարինելու մասին՝ գրավի գումար սահմանելով 5 մլն դրամը:

Հունիսի 1-ին տվյալ քրեական գործի նախաքննության օրինականության նկատմամբ հսկողություն իրականացնող դատախազի կողմից դատարանի հիշյալ որոշման դեմ բերվել էր վերաքննիչ բողոք՝ գրավի կիրառումը անթույլատրելի ճանաչելու պահանջով: Հիշեցնենք, որ Լոռու մարզի քննչական վարչության նախկին պետ Թաթուլ Շուշանյանը մեղադրվում էր Ալավերդցի Վահագն անունով հայտնի Վահագն Աբգարյանից կաշառք ստանալու մեջ: