Վաչագան Ղազարյանը դարձյալ կկալանավորվի. Վճռաբեկ դատարանը գրավի կիրառումը ճանաչել է անթույլատրելի

ՀՀ երրորդ նախագահ Սերժ Սարգսյանի թիկնազորի նախկին պետ Վաչագան Ղազարյանը դարձյալ կկալանավորվի:

Yerkir.am-ի հետ զրույցում գլխավոր դատախազի խորհրդական Գոռ Աբրահամյանը տեղեկացրեց, որ Վճռաբեկ դատարանը բավարարել է Վերաքննիչ դատարանի` խափանման միջոց գրավը կիրառելու մասին  որոշման դեմ ներկայացված բողոքը: «Վճռաբեկ դատարանը բավարարել է գլխավոր դատախազի բողոքը` օրինական ուժ տալով առաջին ատյանի դատարանի որոշմանը Վաչագան Ղազարյանի նկատմամբ կալանավորումը որպես խափանման միջոց ընտրելու մասին, և գրավի կիրառումը ճանաչել է անթույլատրելի»,- ասաց նա:

Հիշեցնենք, որ  Ղազարյանն ավելի վաղ կալանավորվել էր, ապա նրա նկատմամբ խափանման միջոց էր ընտրվել 1 մլրդ դրամ գրավը:  Դատախազությունը բողոքարկել է այս որոշումը, որի արդյունքում կայացվել է Ղազարյանին կրկին կալանավորելու վերաբերյալ որոշում:  Նա մեղադրվում է բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում իր ունեցած դրամական միջոցների իրական չափի մասին` հայտարարագրման ենթակա տվյալները թաքցնելու և ապօրինի հարստանալու մեջ։