Մեկնարկել են միասնական քննությունները

Այսօր մեկնարկել են միասնական քննությունները «Կենսաբանություն», «Աշխարհագրություն» և «Ընդհանուր պատմություն» առարկաներից:

Yerkir.am-ի հետ զրույցում Գնահատման և թեստավորման կենտրոնի արտաքին համագործակցության բաժնի պետ Վարդան Պարսամյանն ասաց, որ, ընդհանուր առմամբ, քննություն է հանձնում 701 դիմորդ: « «Աշխարհագրություն» առարկայի քննությանը կմասնակցի 125, «Ընդհանուր պատմություն» առարկայի քննությանը՝ 34, «Կենսաբանություն» առարկայի քննությանը՝ 542 դիմորդ: Մարզերում և Երևանում տեղակայվել են 12 քննական կենտրոններ»,- ասաց Պարսամյանը:

Նա հիշեցրեց նաև, որ քննությունների արդյունքները պարզ կլինեն 5 օր հետո:

Նշենք, որ հաջորդ քննությունը տեղի կունենա հունիսի 12-ին՝ «Հայոց լեզու և գրականություն» առարկայից: