Երկու պատգամավոր երաշխավորություն է ստորագրել Գևորգ Սաֆարյանի խափանման միջոցը փոխելու մասին

Այսօր ԱԺ «Ելք» խմբակցության պատգամավոր Հայկ Կոնջորյանը և Ալեն Սիմոնյանը երաշխավորություն են ստորագրել` քաղաքացիական ակտիվիստ Գևորգ Սաֆարյանի նկատմամբ խափանման միջոցը փոխելու մասին: «Հուսանք` արդեն այսօր Գևորգը կլինի ազատության մեջ»,- իր ֆեյսբուքյան էջում գրել է Ալեն Սիմոնյանը:

Հիշեցնենք, որ 2017թ. հունվարի 16-ին Կենտրոն և Նորք -Մարաշ վարչական շրջանների ընդհանուր իրավասության դատարանի վճռով Գևորգ Սաֆարյանը դատապարտվել էր երկու տարվա ազատազրկման: Նա ձերբակալվել էր 2016թ. Ամանորի գիշերը Ազատության հրապարակում տեղի ունեցած քաշքշոցի ընթացքում և մեղադրվում էր ոստիկանության ծառայակից Գեղամ Խաչատրյանին հարվածելու մեջ: Այս գործով Սաֆարյանի պատժի կրման ժամկետն ավարտվել է: Նա ներկայումս կալանքի տակ է Ցեղասպանության 100-րդ տարելիցին զանգվածային անկարգություններ կազմակերպելու գործով: