Փաստաբանը չհասցրեց Տիգրան Առաքելյանի խափանման միջոցը փոխելու միջնորդություն ներկայացնել

Այսօր ՀՀ Վերաքննիչ քրեական դատարանում՝ դատավոր Եվա Դարբինյանի նախագահությամբ, տեղի ունեցավ  Հայ ազգային կոնգրեսի ակտիվիստների գործով հերթական դատական նիստը:

Ամբաստանյալ Տիգրան Առաքելյանը հայտարարեց, որ գործով որպես տուժող անցնող ոստիկան Շահեն Հարությունյանը նախորդ նիստերից մեկում սուտ ցուցմունք է տվել, և միջնորդեց նրան կրկին հարցաքննել: Դատավորը բավարարեց միջնորդությունը:

Փոխարենը դատավորը մերժեց Առաքելյանի՝  տուժող ճանաչված Տիգրան Ավետիսյանին կրկնակի դատաբժշկական փորձաքննության ենթարկելու միջնորդությունը՝ պատճառաբանելով, որ առաջին ատյանի դատարանում նման միջնորդություն չեն ներկայացրել, թեև դրա հնարավորությունն ունեցել են: 

Դատավոր Եվա Դարբինյանը մերժեց նաև այս գործով որպես վկա անցնող Հրանտ Միրիջանյանին կրկին դատակոչելու միջնորդությունը:

Այսօր դատարանը  չթույլատրեց անգամ փաստաբան Մուշեղ Շուշանյանին` ներկայացնել քաղբանտարկյալ Տիգրան Առաքելյանի խափանման միջոցը` կալանքը, փոխելու վերաբերյալ միջնորդությունը: 

Դատարանն այսպիսով  հետաձգեց ակտիվիստների գործով դատավարությունը և նոր նիստ նշանակեց հոկտեմբերի 9-ին: