Աշոտ Սիմոնյանը շնորհակալություն է հայտնել ՀՅԴ-ին ու վարչապետին` վստահության համար

 ՀՀ տարածքային կառավարման եւ զարգացման նախարար Սուրեն Պապիկյանը Արագածոտնի մարզպետարանում ներկայացրեց նորանշանակ մարզպետ Աշոտ Սիմոնյանին: 

Հանդիպմանը ներկա էին մարզպետարանի ղեկավար կազմը, աշխատակազմի ստորաբաժանումների ղեկավարները, համայնքապետերը, մարզային ենթակայության կազմակերպությունների, ուժային կառույցների ղեկավարները:

 Նախարարը կարեւորեց այս այցը, քանի որ այն իր առաջին պաշտոնական այցելությունն է մարզ, որը առաջիկայում բազմիցս է կայանալու:

 «Թավշյա հեղափոխության որդյունքում նոր իշխանություն ունենք եւ մեր բոլորի նպատակն է  անցման ժամանակաշրջանը անցնցում եւ դյուրին անցկացնելու»,-ասաց նախարարը եւ նշեց, որ բոլորի պարտքն է  գործողություններն իրականացնել բացառապես ՀՀ Սահմանադրության եւ օրենքների շրջանակներում:

  Նախարարը կարեւորեց համայնքապետերի ժողովրդավար լինելու խնդիրը, խոսեց համայնքապետ-ավագանի հարաբերության, գործողությունները հանրության շահերին ծառայեցնելու  անհրաժեշտության եւ օրախնդիր այլ հարցերի մասին: Նա նշեց Արագածոտնի մարզի մի շարք առանձնահատկությունների, գյուղատնտեսական մթերքների արտադրության եւ արտահանման,  երկրի համաչափ զարգացման եւ այլ խնդիրների մասին:

 Սուրեն Պապիկյանը շնորհավորեց Աշոտ Սիմոնյանին՝ մարզպետի պաշտոնում վերանշանակվելու կապակցությամբ եւ մաղթեց նպաստավոր գործունեություն ծավալել՝ ի նպաստ Հայաստանի Հանրապետության բարօրության :

 Մարզպետ Աշոտ Սիմոնյանը  հպարտությամբ նշեց, որ 8-9 ամիս առաջ իրենց նախանշած ծրագրերը,  գործունեության տրամաբանությունը լիովին համահունչ են ներկա պահանջներին: Նա վստահեցրեց, որ մարզի ղեկավարությունը, ողջ աշխատակազմն ու կառույցները համատեղ  ի զորու են իրականացնելու  առաջադրված խնդիրները:

Աշոտ Սիմոնյանը շնորհակալություն հայտնեց Հայ Հեղափոխական Դաշնակցությանը եւ  երկրի վարչապետ Նիկոլ Փաշինյանին այն բանի համար, որ վստահեցին իրեն եւ հնարավորություն տվեցին ի կատար ածելու մարզի եւ երկրի զարգացման իր տեսլականը: