Վաղը դուք էլ կարող եք նախարար դառնալ. առողջապահության նախարարի կոչը` ֆեյսբուքյան օգտատերերին

«Կոչ եմ անում բոլորին, այսուհետ ֆեյսբուքում գրառումներ կատարելիս, ելնել այն կանխավարկածից, որ վաղը դուք կարող եք նախարար դառնալ»,- այսօր «Ազատություն» ռադիոկայանի «ֆեյսբուքյան ասուլիս» հաղորդման ժամանակ ասաց ՀՀ առողջապահության նորանշանակ նախարար Արսեն Թորոսյանը:

Նշենք, որ ֆեյսբուքյան որոշ օգտատերեր պահել էին Արսեն Թորոսյանի նախկինում արված մեկնաբանությունները, որտեղ նա սուր էր արտահայտվել պատվաստմանը դեմ արտահայտվող մարդկանց, պնդելով, որ պատվաստումը կարող է կյանքեր փրկել:

Առողջապահության նախարարը խոստովանեց, որ այդ մեկնաբանությունները եղել են սուր, կոպիտ, ինչի համար էլ ներողություն է խնդրել:

«Իմ անձնական նախասիրությունները որևէ կերպ չեն անդրադառնալու իմ` որպես նախարար, գործունեության վրա: Եվ եթե ինչ-որ մեկը իմ գործունեության մեջ կտեսնի իմ նախասիրությունների վատ հետևանքները, ես պատրաստ եմ պատասխանատվություն կրել դրա համար»,- ասաց նախարարը: