Beeline. Ucom. Orange. հայաստանյան օպերատորներին ավտոմատ միացումը թուրք օգտատերերին գցել է վատ դրության մեջ

Ներկայիս Թուրքիայի տարածքում գտնվող հայկական Իգդիր (թուրքերեն՝ Ըղդըր) նահանգի բնակիչների ու այդ շրջան այցելողների մոտ համատարած դժգոհություն է. Turkcell, Avea և Vodafone բջջային օպերատորներն այդ տարածքում զանգեր կատարող օգտատերերից գանձում են ավելին, քան Թուրքիայի այլ շրջանների օգտատերերից:

Ըստ CNNTurk-ի՝ Հայաստանի, Իրանի և Ադրբեջանի սահմանին գտնվող Իգդիրից զանգեր կատարելը խնդրահարույց է այն պատճառով, որ միջազգային GSM թվային բջջային տեխնոլոգիաների ստանդարտի կողմից այն ճանաչվում է որպես արտասահման, այսինքն՝ վճարումներ անելիս այն չի ընդգրկվում Թուրքիայի սահմանների մեջ: Հետևաբար՝ վճարումների գումարը զգալիորեն շատ է կազմում, քան մյուս նահանգներում:

Ինչպես նախորդ շաբաթ Անիի ավերակների տարածքում գտնվելիս  թուրք ուսանողները միջազգային GSM թվային բջջային տեխնոլոգիաների ստանդարտի կողմից ստացել էին նամակ՝ «Բարով եկաք Հայաստան» գրությամբ, նույն դեպքը գրանցվել է նաև Իգդիրի բնակիչների մոտ: Նրանք դժգոհություն են հայտնել «այդ պարունակությամբ» նամակ ստանալու կապակցությամբ: GSM-ը, սակայն, խորհուրդ է տալիս նմանատիպ իրավիճակներից խուսափելու համար հեռախոսները դնել «Manuel» վիճակի վրա:

Կայքը ներկայացրել է Իգդիրի բնակիչների հեռախոսների էկրաններին հայտնված` հայաստանյան Beeline, Ucom, Orange բջջային օպերատորներին միանալը ապացուցող լուսանկարներ: