Կառավարությունը զգալիորեն կկրճատի ծառայողական մեքենաների պարկը

Այսօր կառավարության նիստում վարչապետ Նիկոլ Փաշինյանն անդրադարձավ ծառայողական մեքենաների կրճատման հարցին: Նա նշեց, որ պետական կառավարման համակարգում ծառայողական մեքենաների շատ մեծ ընդգրկվածություն կա, ապա հանձնարարեց առաջին փոխվարչապետին` լուրջ գույքագրում իրականացնել ծառայողական մեքենաների մասով` հասկանալու, թե ինչ կրճատումներ կարող են իրականացնել հաջորդիվ:

«Վերջին մեկ տարում արդեն իսկ կրճատումներ եղել են, և պետք է հասկանալ, թե ծառայողական մեքենաների ինստիտուտն ինչ ծավալով պետք է գործի: Ես տեղյակ եմ, որ ժամանակակից աշխարհում կան նաև այլ լուծումներ, մասնավորապես` մասնավոր ընկերություններից որոշակի ծառայություններ ստանալը` նպատակային կոնկրետ գործուղումների կամ կոնկրետ տրանսպորտային կարիքները լուծելու համար: Իհարկե, սա հաշվարկի հարց է, թե որ պարագայում ինչ կարժենա պետբյուջեի համար»,- ասաց նա:

Առաջին փոխվարչապետ Արարատ Միրզոյանը հավելեց, որ ուսումնասիրել է այդ խնդիրը, հանրությանն էլ հուզում է այդ հարցը, որ պետական ապարատում կա ծառայողական մեքենաների գերկուտակում, և դա պետբյուջեի վատնում է:

«Ուզում եմ նշել, որ առաջին փոխվարչապետի գրասենյակին հատկացված էր հինգ մեքենա: Բնականաբար, մենք հրաժարվել ենք 3-ից, 2-ի նպատակահարմարությունը դեռ պետք է քննարկենք: Փոխվարչապետ Տիգրան Ավինյանի գրասենյակին տրամադրված էր 4 մեքենա, նա հրաժարվել է 2-ից: Ես առաջարկում եմ բոլոր նախարարներին` վերանայել իրենց տրամադրության տակ եղած ծառայողական մեքենաների պարկը»,- ասաց Արարատ Միրզոյանը:

ԿԳ նախարար Արայիկ Հարությունյանը հավելեց. «Ուսումնասիրվել ենք այս հարցը: Ուշադրություն եմ ուզում հրավիրել նաև գործուղումների հարցին, քանի որ դրանք երբեմն վերածվում են տուրիստական շրջագայությունների»: