Ազոտական պարարտանյութի մեկ պարկը գյուղացիներին կվաճառվի 6000, իսկ ֆոսֆորականի ու կալիումականի մեկ պարկը՝ 7000 դրամով

Այսօր կառավարության նիստում գյուղատնտեսության նախարար Սերգո Կարապետյանը ներկայացրեց հողօգտագործողներին 2016թ. գյուղատնտեսական աշխատանքների համար մատչելի գներով ազոտական, ֆոսֆորական, կալիումական պարարտանյութերի ձեռք բերման նպատակով պետական աջակություն ցուցաբերելու ծրագիրը:

Նախարարի խոսքով՝ ըստ մարզպետարանների ներկայացրած հայտերի` 2016թ. գյուղատնտեսական աշխատանքների համար պարարտանյութերի ամբողջ պահանջարկը կազմել է `34 594 տոննա` ազոտական, 1079 տոննա` ֆոսֆորական և 1574 տոննա` կալիումական: Պարարտանյութերի ամբողջ պահանջարկը բավարարելու համար անհրաժեշտ էր ներկրել 32 հազար տոննա ազոտական, 320 տոննա ֆոսֆորական և 840 տոննա կալիումական պարարտանյութ:

«Մրցույթին մասնակցելու համար մենք դիմել ենք պարարտանյութ  արտադրող 22 երկրների և ներկրող մի քանի կազմակերպությունների: Բանակցությունների մի քանի փուլից հետո ամենացածր գինը տվել է «Մասիսի բերրիություն» կազմակերպությունը՝ 357, 7 դոլար` մեկ տոննայի համար»,- ասաց Սերգո Կարապետյանը՝ հավելելով, որ մրցույթների արդյունքում գյուղացիական տնտեսություններին մեկ պարկ ազոտական պարարտանյութը կտրվի 6000 դրամով, ինչպես անցյալ տարի, իսկ ֆոսֆորական ու կալիումական պարարտանյութի մեկ պարկը` 7000 դրամով: