Կառավարության նիստում Փաշինյանը մտահոգություն հայտնեց հակակարկտային համակարգի կապակցությամբ

Այսօր ՀՀ վարչապետի պաշտոնում Նիկոլ Փաշինյանի առաջին` կառավարության նիստն է: Օրակարգում ներառված է 15 հարց: Մինչ օրակարգին անցնելը Փաշինյանը խնդրեց գյուղատնտեսության նախարարին` զեկուցել Արմավիրի մարզում երեկ տեղի ունեցած կարկտահարության վերաբերյալ:

Գյուղնախարարի պաշտոնակատար Իգնատի Առաքելյանը հայտնեց, որ օպերատիվ խումբ է մեկնել Արմավիր, որը պետք է տեղեկանա բոլոր մանրամասներին: «Վնասները մեծ չափերի չեն հասել, բայց կան այգիներ, որոնք վնասներ են կրել: Աշխատանքային խումբը կֆիքսի վնասների չափը»,- ասաց նա:

Փաշինյանը հարցրեց` առհասարակ, պրակտիկայում ինչպե՞ս են վարվել, վնասի չափը ֆիքսելուց հետո: Առաքելյանը պատասխանեց, որ սովորաբար գյուղացուն զիջում են հողի, ջրի հարկերը կամ սերմեր են տրամադրում, ավելին չի տրամադրվում պետության կողմից:

Փաշինյանը նշեց, որ այս թեմային կանդրադառնան անպայման, սակայն շեշտեց, որ գյուղացուն պետության կողմից աջակցությունը պետք է լինի ոչ թե ֆորմալ, այլ արդյունավետ, որ մարդիկ զգան, որ պետությունն իրենց կողքին է:

Վարչապետը հարցրեց նաև հակակարկտային համակարգի մասին, թե ինչու այն արդյունավետ չի աշխատում: Նշվեց, որ կան տարածքներ, որոնք դուրս են հակակարկտային ներազդեցության դաշտից: Մասնավորապես` մշակվող հողերի միայն 15 տոկոսն է հակակարկտային ներազդեցության դաշտում: