Պատգամավորները ՍԴ դատավորին ընտրում են առնվազն 3/5-րդով, ինչը բարձր շեմ է. Էմիլ Բաբայան

ԱԺ-ն շարունակում է քննարկել ՍԴ դատավորի ընտրության հարցը: Առաջադրված թեկնածուն Էմիլ Բաբայանն է:

ԱԺ «Ելք» խմբակցության պատգամավոր Արտակ Զեյնալյանը նրանից հետաքրքրքվեց` չի՞ կարծում, որ ավելի համոզիչ կլիներ, եթե ԱԺ ներկայացված թեկնածուն ընտված լիներ մրցույթով: «Այդ դեպքում անկողմնակալ, անաչառ հանձնաժողովը կկարողանար հավակնորդների ցուցակից ընտրություն կատարել, այդ թվում` նաև Ձեզ»,- ասաց նա:

Բաբայանն արձագանքեց, որ այս պահին գործող իրավակարգավորումներով հատուկ ընթացակարգ է սահմանված, որը բարդ և մրցակցային է: «Կան չափանիշներ, որոնց համապատասխանելու դեպքում անձը կարող է հավակնել ՍԴ դատավորի կոչման: Բացի այդ` իշխանության բոլոր ճյուղերը հնարավորություն են ստանում իրենց չափորոշիչներով ներկայացնելու իրենց թեկնածուին»,-բացատրեց նա:

Էմիլ Բաբայանի խոսքով` պատգամավորները թեկնածուին հավանություն են տալիս ընդհանուր ձայների առնվազն 3/5-րդով: «Կարծում եմ` դա չափազանց բարձր շեմ է արժանի թեկնածու ընտրելու համար»,- ասաց նա և հավելեց, որ մրցույթը նախատեսված չէ, եթե նախատեսվի, չի կարծում, թե որևէ խոչընդոտ կարող է լինել: