Արդարադատության նախարարը չպետք է կարծիք հայտնի որևէ դատական ակտի վերաբերյալ.Դավիթ Հարությունյանը` Ժիրայր Սեֆիլյանի դատապարտման մասին

Հայաստանի արդարադատության նախարար Դավիթ Հարությունյանը հրաժարվում է մեկնաբանել և որևէ կարծիք հայտնել Ժիրայր Սեֆիլյանի դատավճռի վերաբերյալ: Լրագրողների հետ զրույցում Դավիթ Հարությունյանն ընդգծեց, որ լրատվամիջոցներն ազատ են այս կամ այն դատական ակտի վերաբերյալ կարծիք հայտնել, բայց գործադիր իշխանության ներկայացուցիչները՝ ոչ:

Հարցին՝ կա՞ն անձինք, ովքեր Հայաստանում ենթարկվել են քաղաքական հետապնդման, Դավիթ Հարությունյանը պատասխանեց. «Ոչ, իմ խորին համոզմամբ, երբևէ որևէ մեկի նկատմամբ քաղաքական հետապնդում Հայաստանում չի իրականացվել»:

Հարցին էլ` այդ դեպքում ինչպե՞ս կարող է որակել Ժիրայր Սեֆիլյանի նկատմամբ 10, 5 տարի ազատազրկման վճիռը, նախարարն ասաց. «Դուք կարող եք ունենալ այլ կարծիք, ես կարող եմ ունենալ այլ կարծիք, բայց սա հարցաքննություն չէ»:

Նախարարը հայտարարեց, որ երբևէ որևէ արդարադատության նախարար, որևէ դատական ակտի վերաբերյալ դիրքորոշում չի արտահայտել, ինչը ճիշտ է:

«Արդարադատության նախարարը չպետք է կարծիք հայտնի որևէ դատական ակտի վերաբերյալ: Անկախ նրանից ես կուսակցական եմ, թե ոչ, ես արդարադատության նախարարն եմ, ինչի հետ դուք ստիպված եք հաշտվել: Իմ առաքելությունն ավելի շատ արդարադատության քաղաքականության ոլորտում է, և, եթե ես պետք է դիրքորոշում հայտնեմ որևէ մի հարցի վերաբերյալ, ես դա արտահայտում եմ օրենսդրական նախաձեռնություն ներկայացնելով»,- ընդգծեց նա: