Նախագահի ընտրության ժամանակ հնարավոր է՝ «Ծառուկյան» խմբակցության պատգամավորներն ազատ լինեն

ԱԺ «Ծառուկյան» խմբակցության պատգամավոր Գևորգ Պետրոսյանը հավաստիացնում է, որ նախագահի թեկնածու Արմեն Սարգսյանին սատարելու հարցի և, ընդհանրապես, նրա անձի շուրջ իրենց կուսակցությունում որևէ քննարկում չի եղել:

Yerkir.am-ի հետ զրույցում անդրադառնալով հարցին, թե ի՞նչ կարծիք ունեն Սարգսյանի մասին` որպես անհատի, նա պատասխանեց, որ անհատի բնութագիր չպետք է ակնկալել, այլ անձի, ով պետություն է ներկայացնելու:

«Հիմա թողնենք Սարգսյանին և այլ ազգանուն: Մենք անձին հանրապետության նախագահի պաշտոնում տեսնելու համար ոչ թե նրա միայն անձնական հատկանիշներն ենք նայում, այլ ամենագլխավորը` որքանով է հավակնում այդ դերը բարձր մակարդակով, ի նպաստ Հայաստանի հզորացման, բարգավաճման իրականացնել: Ես բացարձակ չեմ ճանաչում և բացասական ոչինչ ասել չեմ կարող նրա անձի վերաբերյալ: Ի թիվս բոլորի, նրան հարգանքով եմ վերաբերվում, որովհետև բացասական բան ասելու ո'չ առիթ եմ ունեցել, ո'չ հիմք»,- ասաց պատգամավորը:

Իսկ թե արդյո՞ք ընդունելի թեկնածու է Սարգսյանն իրենց համար, նա նշեց, որ քննարկում չի եղել խմբակցությունում: «Կարող է խմբակցությունում մի այնպիսի կարծիք հնչի, որ դառնա քննարկման առարկա, բայց այս պահի դրությամբ եթե դեռևս ոչինչ չի քննարկվել, ես ո'չ իրավական, ո'չ բարոյական առումով ճիշտ չեմ համարում ինչ-որ մերկապարանոց հայտարարություն անել»,- ասաց Պետրոսյանը:

Այս թեմայով քննարկման ձգձգվելը նա բացատրեց այն բանով, որ իրենց կուսակցության ղեկավարը երկրում չէր, նաև` դրա համար կան ժամկետներ: «Բացի այդ` նախ պետք է առաջադրվի այդ թեկնածուն»,- նշեց պատգամավորը:

Մեր դիտարկմանը` Սարգսյանն ասել է, որ որոշում կկայացնի, երբ բոլոր ուժերի հետ կհանդիպի, նա պատասխանեց.  «Եթե պարոն Սարգսյանն այդպիսի հայտարարություն է արել, ինչպես ասում են` գնդակը նրա դաշտում է, և նա պետք է մեր կուսակցության ղեկավարի հետ հանդիպի, բայց նման հանդիպում եթե չի եղել, մենք էլ անժամանակ ենք համարում նրա գործնական անելիքների, գործնական կերպարի մասին երկարահունչ դատողություններ անելը»:

Պետրոսյանը չբացառեց, որ գուցե այս անգամ էլ «Ծառուկյան» խմբակցության պատգամավորներն ազատ քվեարկելու հնարավորություն ունենան: «Ոչինչ չի կարելի բացառել:  Այս բոլոր հարցերի պատասխանը մոտ ապագայում պարզ կլինի»,- շեշտեց նա:

Պետրոսյանը չհստակեցրեց, թե հանդիպման ընթացքում ինչ թեմաներ են քննարկելու, ինչ հարցադրումներ են հնչեցնելու թեկնածուին: «Եթե քաղաքական ուժերը պետք է դիրքորոշում արտահայտեն այս կամ այն անհատի վերաբերյալ, ով հավակնում է երկիր ղեկավարել, ուրեմն պետք է կարևորվի այդ անձնավորության, նրան շրջապատող բոլոր հանգամանքների ամբողջությունը` զուտ գործնական հատկանիշները, անձնական կերպարը, միջազգային հեղինակությունը, գիտելիքների պաշարը, թե չէ` որպես անձ, մենք որևէ մեկի հանդեպ անհարգալից վերաբերմունք չունենք»,- ասաց նա:

Պատգամավորը նաև նշեց, որ դեռ չի մտածել` ինչ հարց կտա Սարգսյկանին հանդիպման ժամանակ: «Չեմ գտնում, որ ցանկացած պատգամավոր ինչ-որ հարց պետք է տա: Ես կարող է ոչ մի հարց չտամ, բայց ուրիշների տված հարցերի պատասխաններից  ինձ համար դատողություններ անեմ: Ինձ համար` թե' որպես քաղաքացու, թե' որպես «Ծառուկյան» դաշինքի պատգամավորի, կարևորն այն է` անկախ նրանից, թե ով կլինի այդ մարդը, աշխատի ի շահ ՀՀ բնակչության, ի շահ մեր երկրի հզորացման, բարգավաճման, թե չէ` անխոցելի, անթերի մարդիկ չկան` սկսած ինձանից»,- եզրափակեց Պետրոսյանը: