ՌԴ-ն Հայաստանին 100 մլն դոլար վարկ կտա ռուսական զենք գնելու համար

«Հայաստանի Հանրապետության կառավարության և Ռուսաստանի Դաշնության կառավարության միջև՝ Հայաստանի Հանրապետության կառավարությանը պետական արտահանման վարկ տրամադրելու մասին» համաձայնագիրը վավերացնելու մասին հարցի քննարկման ժամանակ ՀՀ Պն փոխնախարար Արտակ Զաքարյանն ասաց, որ ՌԴ-ն մինչև 100 միլիոն դոլարի պետական արտահանման վարկ է տրամադրելու Հայաստանի կառավարությանը՝ ռուսական արտադրության ռազմական նշանակության արտադրանքի մատակարարումների ֆինանսավորման համար: Նա հայտնեց, որ վարկը Հայաստանին տրամադրվելու է 5 տարի ժամկետով՝ 3 տոկոս տոկոսադրույքով:

«Համաձայնագիրն իր բնույթով առանձնահատուկ է, քանի որ հնարավորություն է ընձեռում ձեռք բերելու ռուսական արտադրության ռազմական նշանակության որակյալ արտադրանք, սպառազինություն և ռազմական տեխնիկա այն նույն գնով, ինչը ՌԴ ազգային զինված ուժերի համար է նախատեսվում»,- ասաց փոխնախարարը:

Նրա խոսքով` այս պահին նախաստորագրվել են երեք համաձայնագիր, որոնց ընդհանուր արժեքն ավելին է, քան 100 մլն դոլարը: «Դրանց ընդհանուր արժեքն ավելին է, քան 100 մլն դոլարը, և այս 100 մլն դոլարը կազմում է բոլոր կնքված համաձայնագրերի ընդհանուր արժեքի մոտ 90 տոկոսը»,- ընդգծեց Զաքարյանը:

Փոխնախարարը նաև նշեց, որ ռազմական նշանակության արտադրանքն ամբողջովին նոր է և զգալի կամրապնդի ՀՀ ԶՈւ-ն, ինչն էլ կհանգեցնի ՀՀ անվտանգության բարելավմանը:

Վարկի փաստացի օգտագործված գումարը մարվելու է 5 տարվա ընթացքում՝ սկսած 2023 թվականից: