«Չկա լիմոն, մանդարին, դատապարտեմ այս Նոր տարին». Փաշինյանը ԵԱՏՄ-ից դուրս գալու հարցի քննարկումների ժամանակ անեկդոտ հիշեց

ԱԺ արտաքին հարաբերությունների մշտական հանձնաժողովում շարունակվում է «Ելք» խմբակցության` ԵԱՏՄ-ից Հայաստանի դուրս գալու առաջարկությունը ԱԺ նիստերի օրակարգ մտցնելու հարցի քննարկումը:

«Ելք» խմբակցության ղեկավար Նիկոլ Փաշինյանն իր ելույթում նշեց, որ շատերն այսօր ԵԱՏՄ-ն պաշտոնապես և ոչ պաշտոնապես ասոցացնում են Խորհրդային միության հետ։ Ըստ նրա` ԵԱՏՄ-ում նույնիսկ մեր օլիգարխներին են խեղճացնում, քանի որ ավելի խոշորներն են մոնոպոլացնում տարբեր ոլորտները: Ապա անեկդոտ հիշեց` «չկա լիմոն, մանդարին, դատապարտեմ այս Նոր տարին»՝ համեմատելով սա վերջին օրերի լրահոսի հետ` ԵՄ-ի հետ ստորագրված համաձայնագրի վերաբերյալ: Ըստ Փաշինյանի` մամուլում դա ներկայացվում է որպես միայն նախագահ Սարգսյանի հաջողություն և ազդարարվում, որ Սարգսյանը պատրաստվում է դառնալ վարչապետ 2018 թվականին:

Պատգամավորը նաև հիշեցրեց, որ եթե մինչև ԵԱՏՄ-ին անդամակցելը խոսում էինք միայն «Գազպրոմ»-ի մենաշնորհի մասին, ապա ներկայումս նաև բենզինի մենաշնորհ կա։ Ըստ Փաշինյանի՝ առաջ «Ֆլեշ»-ին ու CPS-ին էինք մեղադրում վառելիքի մենաշնորհ ունենալու մեջ, հիմա դրանք են «Ռոսնեֆտ»-ի պատճառով դարձել մենաշնորհի զոհ, քանի որ հիմա Հայաստանը միայն «Ռոսնեֆտ»-ի բենզին է ներկրում։

Նա անդրադարձավ նաև ՀԱՊԿ-ի վերաբերյալ դիտարկումներին: «Մի հատ հասկանանք՝ ՀԱՊԿ-ն ինչ է.մեր թշնամուն ՀԱՊԿ-ն է զինում: Մեր նախընտրական ծրագրում գրել ենք, որ ՀԱՊԿ շրջանակներում պետք է հստակություն մտցվի, թե ինչ պայմանավորվածություններ կան: ՀԱՊԿ, ՀԱՊԿ... Իրականից դարձրիք Բրյուս Լի: Հասկանանք՝ մեզ օգո՞ւտ է, թե՞ ոչ: Թող իշխանությունը չմտածի, որ եթե դեմ քվեարկեց, այս հարցն օրակարգից դուրս է գալու: Այս քաղաքական օրակարգը ներկա է լինելու այնքան ժամանակ, քանի դեռ համոզվածություն չունենք, որ այդ կազմակերպության շրջանակներում ՀՀ քաղաքացիների շահերը պաշտպանվում են»,- ասաց պատգամավորը:

Փաշինյանի ելույթին արձագանքեց նիստը վարող Արմեն Աշոտյանը. «Ձկնի'կ, լող տուր, լող արա, դրսի որսը թող արա»: