Պետք է որոշենք՝ ճիշտ ուղղությամբ ենք գնում, թե` ոչ. վարչապետ

Այսօր կառավարության հերթական նիստում վարչապետ Կարեն Կարապետյանը իրավական ակտերի նախագծերի կարգավորման ազդեցության գնահատման վերաբերյալ հանձնարարական տվեց: Նա հիշեցրեց, որ 2016 թվականի մարտին կառավարության կողմից հիմնվել է օրենսդրության կարգավորման ազգային հիմնադրամ:

«Իրականացված ուսումնասիրությունների արդյունքում արձանագրել ենք դեպքեր, երբ, առանց հստակ պատճառաբանություններ ներայացնելու, հիմնադրամի կողմից տրամադրված առաջարկությունները չեն ընդունվել»,- ասաց նա:

Ելնելով վերոնշյալից` վարչապետը հանձնարարեց համապետական գործադիր մարմինների ղեկավարներին` գործնականում ապահովել իրավական ակտերի նախագծերի վերաբերյալ կարգավորման ազդեցության արդյունքում ներկայացված առաջարկությունների լիարժեք ուսումնասիրումը և վերլուծումը, իսկ դրանք մերժելու դեպքում ներկայացնել հստակ հիմնավորումներ:

Նա նաև հանձնարարեց մեկամսյա ժամկետում ամփոփել և կառավարության աշխատակազմին ներակայացնել Օրենսդրության կարգավորման ազգային կենտրոն հիմնադրամի` 2018 թվականի տարեկան գործողությունների շրջանակում կարգավորման ազդեցության ենթակա իրավական ակերի նախագծերի վերաբերյալ տեղեկատվությունը՝ հաշվի առնելով կառավարության կողմից հաստատված միջոցառումները և գերակա խնդիրները:

«Հատուկ ուշադրություն դարձրեք սրան, ինձ մոտ այնպիսի տպավորություն է, որ մեկ-մեկ այս հիմնադրամն ինքն է որոշում՝ չունենալով պատվերներ: Քանի որ պատվիրատուն մենք ենք, ստեղծել ենք մի օղակ, որը պետք է բոլոր այդ ռիսկերը գնահատի, համապատասխան վերլուծություն տա, և մենք որոշենք` ճիշտ ուղղությամբ ենք, թե` ոչ»,- ասաց Կարապետյանը: