Բաքվում թեյել ենք ադրբեջանցի խորհրդարանականների հետ. Մանե Թանդիլյան

ՀՀ ԱԺ «Ելք» խմբակցության պատգամավոր Մանե Թանդիլյանն իր ֆեյսբուքյան էջում գրառում է կատարել` անդրադառնալով Բաքվում կատարած աշխատանքներին: Հիշեցնենք, Բաքվում ընթացող Եվրանեսթ ԽՎ-ին մասնակցել է նաև Հայաստանի պատվիրակությունը` ՀՀ ԱԺ  պատգամավորներ Մանե Թանդիլյանը՝ Ելք դաշինքից և Արմեն Աշոտյանը՝ ՀՀԿ-ից: Նրանք այսօր արդեն վերադարձել են Բաքվից, հիմա գտնվում են Վրաստանի մայրաքաղաքում:

«Եվրանեսթ ԽՎ-ում ներկայացրերցի Հայաստանի Հանրապետության փորձը, հաջողություններն ու մարտահրավերները կանանց հավասար հնարավորությունների և հավասար իրավունքների, առողջապահության հարցում: Խոսեցի Հայաստանի ընտրական օրենսգրքով նախատեսված կանանց քվոտավորման ընթացիկ կարգավորումներից և նախատեսվող փոփոխությունների մասին:

Անդրադառնալով եվրախորհրդարանի անդամ տիկին Հեյդի Հաուտալայի այն նկատառմանը, որ Հայաստանը դեռևս չունի Ընտանեկան բռնության մասին օրենք, տեղեկացրեցի, որ օրենքը գտնվում է մշակման փուլում և ամենայն հավանականությամբ այս տարվա դեկտեմբերին կլինի Հայաստանի Ազգային Ժողովում: 

Պետք է նշեմ, որ Ադրբեջանական որոշ լրատվամիջոցներ որոշակի կամ ամբողջական աղավաղումներով են ներկայացրել իմ զեկույցը: Բարեբախտաբար մենք պահպանել ենք մեր բոլոր ելույթների և հարցազրույցների ձայնագրությունները անհրաժեշտության դեպքում օգտագործելու համար:
Երեկոյան ընթրել և թեյել ենք պատվիրակության անդամների և ադրբեջանցի խորհրդարանականների հետ:
Սեպտեմբերի 23-ին շրջել ենք Բաքու քաղաքում։

Այցելել ենք Հին քաղաք թաղամասը և նախկին հայկական եկեղեցի: Եկեղեցին պատկանում է նախագահական գրադարանին և, ըստ իրենց տվյալների, ներկայումս հանդիսանում է գրադարան: Տարածքը փակ է հանրության այցելության համար:
Այցի ամբողջ ընթացքում մեզ ուղեկցել են արարողակարգային և անվտանգության աշխատակիցները: 
Երեկոյան ուշ ժամանել ենք Թբիլիսի: