Թրամփն ու միջնորդ «վեցյակի» անդամները տարբեր կարծիք ունեն Իրանի հարցում

ԱՄՆ նախագահ Դոնալդ Թրամփն ու միջնորդ «վեցյակի» անդամները տարբեր կարծիք ունեն Իրանի հարցում. գրում է РИА Новости-ն:

Հիշեցնենք, որ ՄԱԿ-ում իր ելույթի ժամանակ Թրամփն Իրանի հետ կնքված միջուկային համաձայնագիրն ԱՄՆ-ի համար «ամոթալի» է որակել ու խոսել դրա չեղարկման անհրաժեշտության մասին:

Իրանի նախագահ Հասան Ռոհանիի պատասխանը չի ուշացել: Ելույթում նա հայտարարել է, որ հարցը փակված է, և Թեհրանն առաջինը չի խախտի միջուկային ծրագրի հարցով համաձայնագիրը, սակայն վճռական պատասխան կտա կողմերից ցանկացած մեկի խախտման դեպքում:

Թրամփի տեսակետը այդ հարցում չի համընկնում ոչ միայն Թեհրանի հետ, այլ նաև` միջնորդ «վեցյակի» մյուս 5 անդամների: Գերմանիայի, Չինաստանի, Ռուսաստանի, Ֆրանսիայի ու Մեծ Բրիտանիայի արտաքին քաղաքական գերատեսչությունների ղեկավարները սեպտեմբերի 20-ի երեկոյան հանդիպել են Իրանի արտգործնախարարի հետ:

Հանդիպումից հետո Մոգերինին հայտարարել է, որ բոլոր կողմերը այս պահի դրությամբ կատարում են համաձայնագիրը: «Խախտումներ չկան, և ես լիահույս եմ, որ այսպես կլինի նաև հետագայում»,- ասել է նա:

ՌԴ ԱԳՆ ղեկավար Սերգեյ Լավրովն էլ հայտարարել է, որ կաջակցի իրանական միջուկային ծրագրի հարցով համաձայնագրի կայունությանը: