Պետական պաշտոնյաները զինվորական ծառայությունը պետք է իրենց կենսագրության մի մասը համարեն. Արտակ Զաքարյան

Երեկ Հայաստան-Սփյուռք համաժողովի ընթացքում ՀՀ պաշտպանության նախարար Վիգեն Սարգսյանը նշել էր, որ նախատեսվում է նաև «Հանրային ծառայության մասին» օրենքում համապատասխան դրույթով ամրագրել պետական բարձրաստիճան պաշտոնյաների` ծառայած կամ չծառայած լինելը:

Yerkir.am-ը հետաքրքրվեց պաշտպանության փոխնախարար Արտակ Զաքարյանից` օրենքը միայն բարոյական հարցն է լուծելու, թե նաև` իրավական ինչ-որ խնդիր, այսինքն` հնարավոր կլինի՞ պաշտոնյայի` չծառայած լինելը նաև իրավական դաշտում քննարկել:

Զաքարյանը պատասխանեց, որ օրենսդրական այդ փոփոխության նպատակն է աստիճանաբար գալ նրան, որ պետական բարձրաստիճան պաշտոնյաները զինվորական ծառայությունը համարեն իրենց կենսագրության մի մասը:

«Ծառայած կամ չծառայած լինելու տվյալների հայտարարագրումն ունի ինչպես իրավական, այնպես էլ բարոյական կողմ: Մենք շատ ենք կարևորում զինվորի դերը, մենք նաև ամենաշատը «ծառայող» ազգն ենք, ուստի պետք է այստեղ էլ փոփոխություններ լինեն: Ինքներս մեր հասարակության արժեքային համակարգում պետք է մի բան շատ կարևորենք նաև ապագայի, մեր երեխաների ապագայի համար` եթե ուզում ենք մեր երեխաները մեր երկրի պետական կառավարման համակարգում, հասարակության մեջ արժեքային բարձր ներգրավվածություն ունենան, զինվորական ծառայությունը պետք է դա էլ ավելի բարձրացնի, էլ ավելի մեծ կշիռ, դերակատարություն տա քաղաքացուն, ով իր օրենսդրական, քաղաքացիական պարտքն այդ առումով կատարել է»,- ասաց պաշտպանության փոխնախարարը:

Ըստ նրա` նախատեսում են այնպես անել, որ պարտադիր կոչվածը տարածվի բոլոր օղակների վրա: