Գերմանիան ավելի կսահմանափակի Թուրքիայի հետ տնտեսական համագործակցությունը. Մերկել

Գերմանիայի կանցլեր Անգելա Մերկելը մտադիր է ավելի շատ սահմանափակել Թուրքիայի հետ տնտեսական համագործակցությունը, որպեսզի կարողանա հասնել այդ երկրում կալանավորված գերմանացիների ազատ արձակմանը. հայտնում է ТАСС-ը: Այդ մասին Մերկելն ասել է Passauer Neue Presse թերթին տված հարցազրույցում:

Կանցլերը վրդովված է այն բանից, որ Թուրքիայի ազատազրկման վայրերում առ այսօր կան Գերմանիայի բազմաթիվ քաղաքացիներ: Գերմանիայի իշխանությունների տվյալներով՝ ընդհանուր առմամբ, թուրքական ազատազրկման վայրերում պահվում է Գերմանիայի ավելի քան 50 քաղաքացի, և հիմնականում խոսքը քաղաքական դրդապատճառներով ձերբակալությունների մասին է:

Դրանց ֆոնին գերմանացի քաղաքական գործիչները խստացրել են Անկարայի նկատմամբ հռետորաբանությունը: Սպասվում է, որ հոկտեմբերին կքննարկվի Թուրքիայի՝ ԵՄ անդամ դառնալու շուրջ բանակցությունների պաշտոնական դադարեցման հարցը: